Намеснік начальніка галоўнага ўпраўлення рэгулявання абыходжання з адходамі, біялагічнай і ландшафтнай разнастайнасці - начальнік упраўлення рэгулявання абыходжання з адходамі Міністэрства прыродных рэсурсаў і аховы навакольнага асяроддзя Максім Тарасаў расказаў аб планах па зніжэнні выкарыстання палімернай упакоўкі ў Беларусі і яе замяшчэнні на экалагічна бяспечную ў час круглага стала ў прэс-цэнтры БЕЛТА.

Пастановай Савета Міністраў ад 13 студзеня 2020 года нумар 7 зацверджаны план мерапрыемстваў па паэтапным зніжэнні выкарыстання палімернай упакоўкі з яе замяшчэннем на экалагічна бяспечную. Ён уключае 19 мерапрыемстваў, у тым ліку ў сферах удасканалення сістэмы абыходжання з адходамі, навуковых даследаванняў, вытворчасці і выкарыстання экалагічна бяспечнай упакоўкі, тэхнічнага рэгулявання і скарачэння імпарту палімернай.

"У аб`ектах гандлю рознага фармату прадугледжана абавязковая наяўнасць безалкагольных напіткаў у шкляной тары, а таксама папяровых пакетаў, аднаразовага посуду і сталовых прыбораў з паперы. Пры гэтым мінімізавана колькасць разнавіднасцей пластыкавых пакетаў і посуду з пластыка", - сказаў Максім Тарасаў.

Прадугледжана таксама эканамічнае стымуляванне пераходу з пластыкавай упакоўкі на экалагічна бяспечную. З 1 красавіка 2020 года была зніжана ў два разы плата, якая ўносіцца вытворцамі і пастаўшчыкамі за арганізацыю збору, абясшкоджвання або выкарыстання біяраскладальнай упакоўкі (са Br180 да Br90 за тону). Таксама павялічаны памер платы за арганізацыю збору, абясшкоджвання або выкарыстання палімернай упакоўкі - са Br180 да Br270 за тону, а з 1 студзеня 2021 года - да Br360.

Распрацоўваюцца дзяржаўныя стандарты ў галіне ўстанаўлення патрабаванняў да экалагічна бяспечнай упакоўкі. Беларускі бок ініцыяваў унясенне змяненняў у тэхнічны рэгламент Мытнага саюза "Аб бяспецы ўпакоўкі". У прыватнасці, прапанавана абмежаваць выкарыстанне лёгкіх палімерных пакетаў, спажывецкай упакоўкі для харчовай прадукцыі з успененага полістыролу, а таксама прымяненне оксараскладальных дабавак пры вытворчасці ўпакоўкі.

НАН запланавала на 2020-2025 гады правядзенне комплексу навукова-даследчых работ па вызначэнні найбольш перспектыўных, экалагічна і эканамічна мэтазгодных тэхналогій атрымання біяраскладальных матэрыялаў і ўпакоўкі.

Акрамя таго, з 1 студзеня 2021 года ў грамадскім харчаванні будзе забаронена выкарыстанне аднаразовых пластыкавых відэльцаў, лыжак, нажоў, палачак для размешвання напіткаў, кубкаў, талерак, трубачак (саломінак) для напояў, упакоўкі для прадукцыі грамадскага харчавання і харчовых прадуктаў (кантэйнеры, латкі, скрынкі, ланч-боксы, корэксы, бутэлькі), за выключэннем упакоўкі для кулінарных паўфабрыкатаў і кандытарскіх вырабаў.

23 снежня 2020, Мінск
БЕЛТА