Беларускі прафсаюз работнікаў аховы здароўя накіраваў лячэбным установам каля Br55 тыс. бязвыплатнай спонсарскай дапамогі на стварэнне камфортных умоў працы для работнікаў у перыяд паніжаных тэмператур.

Як расказала галоўны тэхнічны інспектар працы Людміла Марозава, выдзеленыя з прафбюджэту сродкі дапамагаюць арганізацыям ва ўмацаванні матэрыяльна-тэхнічнай базы. Гэта дазваляе шмат каму палепшыць санітарна-бытавыя ўмовы, абсталяваць пакоі прыёму ежы, а таксама набыць сродкі індывідуальнай абароны.

У Гомельскай гарадской клінічнай бальніцы хуткай медыцынскай дапамогі за спонсарскія сродкі набылі пяць цяплавы вентылятар. Прафсаюзную дапамогу ў Гомельскім абласным клінічным кардыялагічным цэнтры, Нараўлянскай і Кобрынскай ЦРБ выкарыстоўвалі для набыцця халадзільнікаў, мікрахвалевых печаў і электрачайнікаў для аснашчэння пакояў прыёму ежы, а ў Гомельскай цэнтральнай гарадской клінічнай паліклініцы — на закупку сродкаў індывідуальнай аховы.

У арганізацыі аховы здароўя Віцебскай вобласці на закупку абсталявання для пакояў прыёму ежы выдзелена Br33 тыс. прафсаюзных сродкаў.

Падарункавы сертыфікат ад Магілёўскага абласнога камітэта прафсаюза атрымала адміністрацыя Магілёўскай абласной дзіцячай бальніцы для паляпшэння санітарна-бытавых умоў.

Як адзначыла Людміла Марозава, Беларускі прафсаюз работнікаў аховы здароўя з году ў год дапамагае арганізацыям ствараць санітарна-эпідэміялагічны дабрабыт работнікаў у перыяд павышаных і паніжаных тэмператур. Яна нагадала, што за тры летнія месяцы мінулага года на ўмацаванне матэрыяльна-тэхнічнай базы прафсаюзам накіравана звыш Br95 тыс.

Звязда, 5 студзеня 2024