З 27 жніўня павышаны адпускныя цэны на этылавы харчовы спірт і рознічныя цэны на гарэлку на 5 працэнтаў з аб`яднаннем гарэлак са спірту "Люкс" у адзіную цэнавую пазіцыю з дыферэнцыяцыяй у залежнасці ад мацунку і ёмістасці шклатары.
Рознічная цана на гарэлку мацункам 40 працэнтаў складзе Br8240 за 0,5 л без кошту посуду, паведамілі ў прэс-службе Міністэрства эканомікі.
Павышэнне ажыццёўлена ў адпаведнасці з пастановай Міністэрства эканомікі ад 18 жніўня 2010 года № 126 "Аб цэнах на алкагольную прадукцыю і прызнанні страціўшымі сілу асобнага палажэння пастановы і некаторых пастаноў Міністэрства эканомікі Рэспублікі Беларусь".
Дакументам устаноўлены адзіныя ўзроўні мінімальных адпускных цэнаў на іншыя віды алкагольнай прадукцыі мацункам звыш 28 працэнтаў айчыннай вытворчасці і імпартную алкагольную прадукцыю, ніжэй за якія лікёра-гарэлачныя арганізацыі рэспублікі і імпарцёры не могуць рэалізоўваць названую алкагольную прадукцыю.
Пастанова прынята для забеспячэння эфектыўнай работы лікёра-гарэлачнай галіны, кампенсацыі павелічэння акцызнага падатку.
БЕЛТА 27.08.2010
