Якія падзеі адбыліся 18 студзеня і чым адзначаны гэты дзень у народным календары, чытайце далей:

У 1401 годзе ў Вільні Вітаўт разам з біскупамі, князямі і баярамі ВКЛ выдаў першыя акты Віленска-Радамскай уніі.

У 1921 годзе было заснавана Дзяржаўнае выдавецтва Беларусі.

1882 год: Іосіф Лангбард, беларускі савецкі архітэктар.

1895 год: Лявон Більдзюкевіч, беларускі педагог, матэматык, грамадскі дзеяч.

1903 год: Аляксандр Фурсенка, беларускі навуковец-палеантолаг.

Таксама сёння нарадзіліся англійскі пісьменнік Алан Аляксандр Мілн, англа-амерыканскі акцёр Кэры Грант і амерыканскі акцёр Кевін Костнер.

Сёння ў праваслаўных вернікаў Вадохрышчанская куцця, або Галодны вечар. У гэты час прыпыняліся застоллі і гулянні, людзі рыхтаваліся да посту, варылі прэсную куццю без алею і тварагу.

Сёння апошні вечар, калі дзяўчыны маглі паваражыць на нарачонага. Існавала шмат спосабаў даведацца пра свой лёс.

Напрыклад, трэба было зняць з нагі абутак і кінуць яго за плот – у які бок ён лёг наском, адтуль і будзе жаніх.

Таксама перад сном дзяўчыны часалі валасы і клалі грэбень пад падушку са словамі: "Хто прыйдзе і мяне прычэша?". У сне павінен быў з`явіцца нарачоны.

Напярэдадні Вадохрышча нельга прыбіраць у хаце, мыць бялізну, сварыцца і крыўдзіць каго-небудзь. Нельга таксама пазычаць грошы.

Калі 18 студзеня падаў снег, гэта было добрым знакам – будзе добры ўраджай мёду. Але завіруха прадвяшчала, што і праз тры месяцы будзе снег.

Sputnik, 18 студзеня 2023