Андрэй Швед адзначыў, што расійскія калегі на падставе вялікага масіву архіўных дакументаў папярэдне падрыхтавалі тыя звесткі, якія звязаны з генацыдам беларускага народа, з гэтымі дакументамі працуюць беларускія следчыя.

"Мы цяпер з улікам падпісаных працэсуальных дакументаў сінхранізавалі свае дзеянні, нашы следчыя працуюць практычна ў штодзённым рэжыме. Адна з задач, якая будзе вырашацца, - вышук жывых злачынцаў. У расійскіх калег па гэтым пытанні таксама дастаткова канкрэтнай інфармацыі і мы маем намер яе выкарыстоўваць, каб паўторна звярнуцца ў некаторыя дзяржавы, дзе яшчэ пражываюць эсэсаўцы, і зноў паставіць пытанне аб іх адказнасці, паколькі генацыд не мае тэрміну даўнасці", - сказаў Андрэй Швед.

На пытанне, ці можна зрабіць што-небудзь у прававым полі ў сувязі з адмовай шэрага краін супрацоўнічаць з Беларуссю па пытаннях генацыду, Андрэй Швед адказаў адмоўна. "Я думаю, што не - з-за таго, што гэта палітыка іх урадаў, звязаная з выкарыстаннем нацысцкай ідэалогіі як элемента сваёй дзяржаўнай палітыкі", - сказаў ён.

"На жаль, калі гэта вырашаецца на ўзроўні ўрада, калі ўрад лічыць, што пытанне аб адказнасці эсэсаўцаў шкодзіць палітычным інтарэсам гэтай дзяржавы, мы разумеем, што ў прававым полі нейкія спробы дарэмныя, - заўважыў генпракурор. - Але грамадскасць павінна ведаць, людзі павінны ведаць. Таму мы будзем аб гэтым пастаянна гаварыць".

Паводле яго слоў, на тэрыторыі гэтых дзяржаў вельмі шмат людзей, якія з`яўляюцца нашчадкамі пераможцаў і зацікаўлены ва ўстанаўленні справядлівасці. Многія з іх з`яўляюцца сваякамі людзей, якія прайшлі жахі канцлагераў, зведалі катаванні. "Яны таксама зацікаўлены і арыентуюць нас на атрыманне дакладнай інфармацыі", - адзначыў генпракурор.

Прадаўжаючы тэму супрацоўніцтва з Расіяй, Андрэй Швед расказаў, што група пракурорскіх работнікаў ужо тройчы выязджала ў Маскву для работы ў архівах. На наступным тыдні адбудзецца чарговы рабочы візіт.

Акрамя таго, расійскія калегі зацікаўлены ў тых звестках, якія атрымлівае беларуская Генпракуратура. "У нас вялікі аб`ём інфармацыі дзякуючы таму, што мы кожны дзень праводзім па ўсёй рэспубліцы спектр працэсуальных дзеянняў. Гэта і допыты жывых сведак, яны не спыняюцца, хоць на сёння дапытана ўжо больш за 15 тыс. чалавек. Праведзены сотні аглядаў месцаў масавага знішчэння. У гэтыя дні ў 11 месцах праводзяцца канкрэтныя агляды месцаў здарэнняў з выманнем астанкаў забітых людзей, рэчыўных доказаў", - адзначыў генпракурор.

Цяпер у рэспубліцы праводзіцца шырокая акцыя, звязаная з перапахаваннем, увекавечваннем памяці загінулых.

"Падчас агляду шэрага месцаў здарэнняў, у тым ліку пад Мінскам, устанаўліваюцца звесткі аб канкрэтных грамадзянах былога Савецкага Саюза, у тым ліку чырвонаармейцаў. Гэта грамадзяне Расіі, Казахстана, Узбекістана. На жаль, я лічу, гэты сумны спіс будзе папаўняцца. З іншага боку, сваякі, нашчадкі герояў, асабліва чырвонаармейцаў, камандзіраў Чырвонай Арміі, у нашы дні дзякуючы сумеснай рабоце даведваюцца пра лёс сваіх дзядуль і прадзядуль", - заўважыў Андрэй Швед.

Удзельнікамі Каардынацыйнага савета з`яўляюцца кіраўнікі і дэлегацыі генеральных пракуратур Азербайджана, Арменіі, Беларусі, Казахстана, Кыргызстана, Расіі, Таджыкістана, Узбекістана, а таксама Сакратарыята КСГП СНД.

Як адзначыў генпракурор Беларусі, з-за тых выклікаў і пагроз, якія склаліся ў свеце ў цэлым, рабочы парадак дня пасяджэння быў скарэкціраваны і дапоўнены шэрагам пытанняў, звязаных у тым ліку з такімі вострымі тэмамі, як процідзеянне генацыду, рэабілітацыя нацызму, барацьба з кіберзлачыннасцю, рэальная абарона правоў, жыцця і свабоды чалавека і інш.

24 чэрвеня 2022, Мінск
БЕЛТА