Якія падзеі адбыліся 13 траўня і чым адзначаны гэты дзень у народным календары, чытайце далей:
Гістарычныя падзеі 13 траўня
У 1986 годзе адкрыўся V з`езд Саюза кінематаграфістаў СССР, на якім першым сакратаром быў абраны рэжысёр Элем Клімаў. З "паліцы" былі ўзяты раней забароненыя цэнзурай фільмы.
Хто нарадзіўся 13 траўня
1905 год: Стэфанія Станюта, беларуская актрыса.
1933 год: Аляксандр Кішчанка, мастак, аўтар вядомага "Габелена стагоддзя".
1949 год: Сяргей Краўчанка, беларускі акцёр.
Таксама сёння нарадзіліся амерыканскі пісьменнік-фантаст Роджэр Жалязны і французскі спявак Грэгары Лемаршаль.
13 траўня ў народным календары
Сёння праваслаўныя вернікі шануюць памяць апостала Іакава Завядзеева – аднаго з дванаццаці апосталаў, бліжэйшага вучня Ісуса Хрыста. У народзе яго называлі Якаў Цёплы, таму што да гэтага дня ўжо надыходзіла добрае надвор`е. Жанчыны верылі, што дождж на Якава прадвяшчае шмат вяселляў увосень.
13 траўня імкнуліся пазбягаць далёкіх вандровак. Лічылася, што ў гэты час вандруюць па свеце апошнія ліхаманкі, і, каб зберагчы здароў`е, лепей было застацца дома.
Калі неба на захадзе яснае, лета будзе пагодлівае, калі ж сонейка сядае ў аблокі, будуць дажджы.
Sputnik, 13 траўня 2024
