Як растлумачыў дырэктар прадпрыемства «Сталічны транспарт і сувязь» Юрый Супрановіч, з адкрыццём участка трэцяй лініі метро да станцыі «Слуцкі гасцінец» будзе перагледжаны рух грамадскага транспарту.
«Мы разглядаем варыянты змены трасы некаторых дзеючых маршрутаў. Магчымая таксама карэкціроўка інтэрвалаў руху, а ў шэрагу выпадкаў маршруты будуць падоўжаныя да новых станцый метро», — адзначыў Юрый Супрановіч.
Зеленалужская лінія метро, адкрытая ў лістападзе 2020 года, на сённяшні дзень уключае чатыры станцыі: «Кавальская Слабада», «Вакзальная», «Плошча Францішка Багушэвіча» і «Юбілейная плошча». Да канца 2024 года чакаецца ўвод у эксплуатацыю станцый «Аэрадромная», «Немаршанскі сад», «Слуцкі гасцінец» і электрадэпо «Слуцкае».
Як раней паведамляў дырэктар Мінскага метрапалітэна Уладзімір Сотнікаў, Зеленалужская лінія штодня перавозіць каля 15 тыс.пасажыраў. З адкрыццём новых станцый гэты паказчык істотна ўзрасце.
Звязда, 10 снежня 2024
