Як паведамляецца на сайце Міністэрства па падатках і зборах, усяго ў 2015 годзе збор на фiнансаваньне дзяржвыдаткаў заплацілі 62,7 тысячы грамадзянаў у памеры 18,6 мільёна рублёў.

Аднак з улікам распараджэньня прэзыдэнта ад 5 лiпеня 2017 году № 111рп «Аб вяртаньні збору на фiнансаваньне дзяржаўных выдаткаў» падаткоўцы вярнулі гэты збор 15,2 тысячы грамадзянаў, якія яго сплацілі і пасьля працаўладкаваліся.

У верасьні падчас прызначэньня новых кіраўнікоў мясцовай вэртыкалі Аляксандар Лукашэнка заявіў, што «дармаедзкі» дэкрэт № 3 ніхто не адмяняў:

«Гэта будзе ваш дакумэнт. Вы на месцы павінны вызначыць, хто ў вас не працуе, а павінен працаваць, і прымусіць іх усіх працаваць. У гэтым будзе асноўная сутнасьць дакумэнту. Ня зь Менску трэба кіраваць гэтымі працэсамі... Камусьці трэба дапамагчы, кагосьці трэба за руку прывесьці на працу, кагосьці перапрафіляваць, навучыць новым спэцыяльнасьцям, а некага проста „нахіліць“».

Дармаедзкі дэкрэт № 3 выклікаў хвалю пратэстаў у Беларусі. Удзельнікі «Маршаў недармаедаў» патрабавалі адмяніць дэкрэт. Пасьля гэтага ўлады заявілі, што яго выкананьне прыпынена на год і ў дакумэнт будуць унесены зьмены.

Лукашэнка запатрабаваў абнавіць дэкрэт № 3 да 1 кастрычніка. Паводле чыноўнікаў, «дармаедзкаму» дэкрэту надалі новую назву і правялі «карэнную рэканструкцыю».

Дэпутатка Палаты прадстаўнікоў ад Аб’яднанай грамадзянскай партыі Ганна Канапацкая перадавала ў адміністрацыю Лукашэнкі праект АГП, у якім прапаноўвалася замест «падатку на дармаедаў» увесьці адрасную грашовую падтрымку ў залежнасьці ад прыбытку, даваць ваўчары на пачатковую і сярэднюю адукацыю і ўвесьці індывідуальнае мэдычнае страхаваньне.

Адзін зь лідэраў Беларускага нацыянальнага кангрэсу Мікола Статкевіч паведаміў, што 21 кастрычніка ў Менску пройдзе «Марш абураных беларусаў 2.0».

Радыё Свабода, 5 кастрычніка 2017