З пачатку 2015 года ў Беларусі выяўлена 3.108 нарказлачынстваў, устаноўлена 1.722 асобы, якія іх ўчынілі. 

З 1 чэрвеня па 15 верасня па ініцыятыве Міністэрства ўнутраных спраў на тэрыторыі Беларусі праводзіцца спецыяльная праграма "Мак". Мерапрыемствы рэалізуюцца ва ўзаемадзеянні з КДБ, Дзяржпагранкамітэтам, Дзяржаўным мытным камітэтам, а таксама грамадскімі фарміраваннямі. 

Асноўныя мэты праграмы — спыненне распаўсюджвання наркасыравіны расліннага паходжання, выяўленне і знішчэнне пасеваў культур з утрыманнем наркатычных рэчываў. 

Так, 3 чэрвеня на пустках паблізу вёсак Улукоўе і Клімаўка Гомельскага раёна супрацоўнікі мясцовага РАУС і палка ППСМ УУС знішчылі плантацыі канопляў плошчай 1,9 і 0,5 га. А на полі каля вёскі Гутавічы Брэсцкага раёна міліцыянеры выявілі 1 га дзікарослага маку. 

Надоечы ў вёсцы Баравая Мінскага раёна супрацоўнікамі ўпраўлення па наркакантролі і процідзеянні гандлю людзьмі, АМАП УУС Мінскага аблвыканкама і аддзела па наркакантролі і процідзеянні гандлю людзьмі Кастрычніцкага РУУС Мінска затрыманы непрацуючы жыхар пасёлка Сонечны 1966 года нараджэння. У яго канфіскавана 1,3 г высушанай марыхуаны. Па месцы жыхарства затрыманага канфіскавана 101 г аналагічнага расліннага рэчыва. Распачата крымінальная справа. 

МУС нагадвае, што паводле дзейнага заканадаўства пасеў ці вырошчванне забароненых да апрацоўкі раслін з мэтай збыту ці вырабу наркатычных сродкаў цягне крымінальную адказнасць аж да пазбаўлення волі на тэрмін да 15 гадоў.

Вячаслаў Будкевіч, БелаПАН
Мінск, 11 чэрвеня 2015