Супрацоўнікамі наркакантролю Цэнтральнага РУУС Мінска пры сілавой падтрымцы спецпадраздзялення МУС "Алмаз" у выніку правядзення аператыўна-вышуковых мерапрыемстваў спыненая дзейнасць наркадылераў, якія арганізавалі ў сталіцы рэалізацыю марыхуаны.

Першым быў затрыманы 31-гадовы жыхар Цэнтральнага раёна сталіцы, які нідзе не працуе, — пакупнік наркотыкаў. Малады чалавек спрабаваў схавацца ў гаражным кааператыве, дзе ў сваёй аўтамашыне, у тайніку, хаваў набыты пакецік з марыхуанай вагой вышэйшай за 3 г.

Падчас далейшага правядзення спецаперацыі быў затрыманы 36-гадовы мінчанін, які нідзе не працуе і які арганізаваў збыт наркотыка. У яго дома была марыхуана, якую ён не паспеў рэалізаваць. Наркотыкі на рэалізацыю пастаўляў жыхар раёна Курасоўшчына — 31-гадовы гаспадар аднаго са сталічных салонаў тату. Мужчына таксама з`яўляецца прафесійным фатографам і кампазітарам песень у стылі рэп. Падчас правядзення вобыску ў яго дома было знойдзена больш як 65 г марыхуаны, што захоўвалася ў трохлітровым слоіку. 

У дачыненні да ўсіх трох распачатыя крымінальныя справы на падставе арт. 328 КК (незаконны абарот наркатычных сродкаў, псіхатропных рэчываў, іх прэкурсораў і аналагаў). 31-гадоваму пакупніку марыхуаны пагражае да пяці гадоў пазбаўлення волі, а рэалізатарам наркотыка — пазбаўленне волі на тэрмін да 15 гадоў.

Вячаслаў Будкевіч, БелаПАН
Мінск, 29 снежня 2015