Рыхтуецца новая рэдакцыя Дырэктывы нумар 4 аб развіцці прадпрымальніцкай ініцыятывы і стымуляванні дзелавой актыўнасці. "Падрыхтаваны новы праграмны дакумент у развіццё тых прынцыпаў, якія закладзены ў Дырэктыве нумар 4. Цяпер дакумент разглядаецца ва ўрадзе і Адміністрацыі Прэзідэнта", - сказаў Пётр Арушаньянц. 

Новая рэдакцыя павінна пасадзейнічаць лібералізацыі ўмоў работы, узмацненню канкурэнтаздольнасці малога і сярэдняга бізнесу, стварэнню роўных умоў для суб`ектаў розных форм уласнасці.

Плануецца таксама прапісаць комплекс мер па надзяленні ўласніка дадатковымі правамі. "Гэта ў тым ліку магчымасць набыцця маёмасці, паколькі некаторым суб`ектам не хапае вытворчых плошчаў", - растлумачыў ён.

Паводле інфармацыі Пятра Арушаньянца, сёння ў малым і сярэднім бізнесе працуе прыкладна трэцяя частка эканамічна актыўнага насельніцтва. Доля малога і сярэдняга бізнесу ў ВУП Беларусі цяпер складае 25 працэнтаў. "Яшчэ 15 гадоў таму яго доля займала ўсяго 10 працэнтаў, на працягу некалькіх гадоў мы назіралі рост да 25 працэнтаў. У еўрапейскіх краінах гэты паказчык большы, але, разам з тым, у нас патэнцыял ёсць, і трэба дапамагчы яму раскрыцца", - лічыць намеснік дырэктара дэпартамента па прадпрымальніцтве.

29 ліпеня 2015, Мінск
БЕЛТА