Як паведамляе ГУУС Мінгарвыканкама, днямі па лініі 102 паступіла інфармацыя, што з кватэры на першым паверсе дома па вуліцы Волаха чутны гучны плач дзіцяці. Дзверы ніхто не адчыняе, хоць у кватэры павінны быць дарослыя. 

Ледзь міліцыянеры і медыкі прыбылі на месца, як акно кватэры адчынілася, і адтуль выйшаў малады чалавек. Падаконнік знаходзіўся не надта высока, і праз некаторы час хлопец, які не атрымаў сур`ёзных траўм, невыразна спрабаваў растлумачыць здарэнне ў машыне хуткай дапамогі. 

Дзверы па-ранейшаму ніхто не адчыняў, таму супрацоўнікі міліцыі вырашылі трапіць у кватэру праз прыадчыненае акно.

Міліцыянерам адкрылася дзіўная карціна: маленькая дзяўчынка моцна плакала на жываце маладога чалавека. Той ляжаў на канапе, выцягнуўшы рукі па швах, погляд адсутнічаў. Ні на дзіцячы плач, ні на з`яўленне міліцыянераў хлопец не адрэагаваў. Юнак з`яўляецца дзядзькам дзяўчынкі, якога пакінулі дагледзець пляменніцу. 

Як пазней высветлілася, у арандаванай кватэры жывуць муж і жонка з двухгадовай дачкой, а таксама 17-гадовы брат маладой жанчыны. Маці дзяўчынкі апынулася ў бальніцы, а мужу на некалькі гадзін неабходна было адлучыцца па працы. З дзіцем папрасілі пабыць маладога дзядзьку. Той запрасіў у госці прыяцеля, які прапанаваў правесці час з курыльнай сумессю. Неўзабаве пад уздзеяннем псіхатропаў госця рэзка пацягнула на прагулку, і ён выйшаў проста ў акно. Апошняе, што памятаў гаспадар, — як узяў дзіця, якое плакала, на рукі. 

Маладыя людзі ўжывалі спайс у прысутнасці дзіцяці. Дзяўчынка дыхала псіхатропным дымам, таму з папярэднім дыягназам "атручэнне" яе накіравалі ў бальніцу.

Вячаслаў Будкевіч, БелаПАН
Мінск, 8 снежня 2014