Выстаўка "Дзеці вайны", прымеркаваная да Дня Перамогі, пройдзе ў мінскім Палацы мастацтваў 18-20 мая.

Матэрыялы экспазіцыі раскажуць аб дзяцінстве, апаленым вайной, аб юных партызанах, падпольшчыках, вязнях канцлагераў. Тут прадстаўлены дакументы, фатаграфіі і іншыя помнікі ваеннага часу з фондаў музея Вялікай Айчыннай вайны, а таксама фотаработы на ваенную тэматыку фатографа з Санкт-Пецярбурга, малюнкі дзяцей, карціны беларускіх мастакоў-ветэранаў.

Наведаць выстаўку можа бясплатна любы жадаючы. Прадугледжана работа экскурсаводаў-валанцёраў. На 18 мая намечана ўрачыстае адкрыццё праекта, віншаванне ветэранаў. Перад прысутнымі выступяць ансамбль "Памяць Сэрца" РДК ветэранаў, аркестр сувораўскага вучылішча.

"Аб дзецях, якія перажылі вайну, страцілі дзяцінства, мала гавораць і пішуць, але яны таксама героі. Іх працоўныя подзвігі і роспачную храбрасць, патрыятызм нельга забываць. Час, напоўнены пакутамі, голадам, смерцю блізкіх людзей, - агульная трагедыя", - адзначылі ў "Беларускім Саюзе блакаднікаў Ленінграда".

Арганізатарамі мерапрыемства выступаюць грамадскае аб`яднанне "Беларускі саюз блакаднікаў Ленінграда" сумесна з грамадскім аб`яднаннем "Беларускі саюз мастакоў", МСКГА "Русь Маладая" і музеем Гісторыі Вялікай Айчыннай вайны пры садзейнічанні пасольства Расіі ў Беларусі і Мінгарвыканкама.

Выстаўка "Дзеці вайны" - не першая акцыя, прысвечаная ваеннаму дзяцінству. У студзені бягучага года ў Мінскім дзяржаўным Палацы дзяцей і моладзі прайшоў вечар памяці да 70-годдзя прарыву блакады Ленінграда, адбылася прэм`ера дакументальнага фільма "Хроніка блакаднага дзяцінства".

17 мая 2013, Мінск
Надзея Радзівон - БЕЛТА