У Беларусі "няма магчымасці і неабходнасці ўтрымліваць вялікую армію, якую трэба карміць, апранаць", заявіў Аляксандр Лукашэнка 3 лістапада падчас наведвання стацыянарнага пункта кіравання штаба зоны тэрытарыяльнай абароны ў Мінску. Пра гэта паведамляе прэс-служба прэзідэнта.
"У нас такой магчымасці сёння няма — і не трэба, але трэба падрыхтаваць насельніцтва, каб яно магло ў патрэбны момант выканаць свае функцыі. Гэта будзе самая эфектыўная абарона нашай дзяржавы. Таму што яны непасрэдна прыйшлі з дому, з калектыву, і яны будуць усё ведаць, што адбываецца", — цытуе Лукашэнку прэс-служба.
Паводле яго слоў, тэрытарыяльныя войскі з`яўляюцца эфектыўным сродкам абароны дзяржавы ў выпадку знешняй агрэсіі, бо такая сістэма дазваляе мінімізаваць фінансавыя затраты.
"Нам трэба захаваць нашу краіну. А калі ўсе будуць бачыць, што мы гэтым сур`ёзна займаемся, — яны сюды ніколі не сунуцца", — дадаў ён.
Лукашэнка выказаў меркаванне, што неабходна "шырэй прапагандаваць ідэі тэрытарыяльнай абароны, больш расказваць людзям пра тое, што гэта такое і для чаго гэта патрэбна". Ён запатрабаваў, каб быў поўнасцю выключаны фармалізм "у падрыхтоўцы тэрытарыяльных войскаў і арганізацыі тэрытарыяльнай абароны". "Усё гэта вельмі сур`ёзна, і не таму, што мы чагосьці там баімся. Нам трэба забяспечваць бяспеку сваёй краіны", — сказаў кіраўнік дзяржавы.
Прынцып тэрытарыяльнай абароны прадугледжвае, што войскі камплектуюцца ваеннаслужачымі з ліку жыхароў той мясцовасці, дзе размяшчаюцца камплектуемыя воінскія часці. У Беларусі гэта сістэма пачала актыўна развівацца ў 2001 годзе.
Захар Шчарбакоў,
БелаПАНМінск, 3 лістапада 2011
