Свята Благавешчання адно з самых старажытных у хрысціянстве. Яно усталявана ў памяць аб паведамленні арханёлам Гаўрыілам Дзеве Марыі добрай весткі аб будучым нараджэнні Сына Божага Ісуса Хрыста і пра тое, што яна абраная стаць «блаславёнай паміж жонкамі». Збянтэжаная прывітаннем анёла, Марыя паверыла ў яго абяцання і выказала сваю веру словамі: «Хай будзе Мне па слову твайму». Словы, якімі архангел вітаў Марыю, ляглі ў аснову малітвы «Авэ Марыя» («Радуйся, Марыя»).

Згодна з хрысціянскай тэалогіяй падзея з’яўляецца пачаткам божага збавення свету — Савета Прасвятой Тройцы пра Богаўцелаўленне для выратавання людзей ад іх грахоў і даравання ім вечнага жыцця. Таму для хрысціян свята Благавешчання мае асаблівую значнасць.

Благавешчанне выпадае альбо на дні Вялікага посту, альбо на тыдзень велікодных урачыстасцяў (Светлую сядміцу). У залежнасці ад гэтага свята кожны раз мае асаблівую літургію. Царкоўнае святкаванне Благавешчання не адмяняецца, калі нават свята прыпадае на Вялікдзень, і тады з велікоднымі спевамі злучаюцца спевы Благавешчання. Калі Благавешчанне прыпадае на пост, то пост дзеля яго саслабляецца.

Звязда, 25 сакавіка 2022