Навукоўцы СібГМУ сумесна з расійскімі і замежнымі калегамі распрацавалі перспектыўны спосаб мэтавай дастаўкі лекаў у арганізм на аснове клеткавых тэхналогій, больш эфектыўны і менш таксічны ў параўнанні з прыёмам таблетак або ін’екцыямі прэпаратаў. Па словах аўтараў, іх распрацоўка дапаможа развіццю рэгенератыўнай медыцыны і тканкавай інжынерыі. 

Мезенхімальныя ствалавыя клеткі (МСК) у арганізме дарослых людзей фармуюць розныя клеткавыя папуляцыі і забяспечваюць рэгенерацыю костак, храсткоў і некаторых іншых тканін арганізма.

Па дадзеных навукоўцаў Сібірскага дзяржаўнага медыцынскага ўніверсітэта (СібГМУ), МСК могуць паглынаць і пераносіць у паталагічныя ўчасткі мікракантэйнераў з лекамі, што дазваляе спадзявацца на мэтавую (таргетную) тэрапію.

Гэта мае асаблівае значэнне для дастаўкі тых лекавых сродкаў, якія дрэнна пранікаюць праз тканкавыя бар’еры арганізма — страўнікава-кішэчны тракт і гематаэнцэфалічны бар’ер, адзначыў прафесар кафедры марфалогіі і агульнай паталогіі СібГМУ Ігар Хлусаў.

«Навукоўцы спрабуюць таксама ўжываць іншыя клеткі, напрыклад, лейкацыты крыві, для ўнутрыклеткавай загрузкі лекаў у мікра- і нанакантэйнерх. Але асаблівасць МСК тлушчавай тканіны ў тым, што яны могуць паглынаць вялікую колькасць мікракапсул і валодаюць накіраваным рухам у зону запалення», — распавёў ён.

Даследчыкі здолелі ў пэўных умовах насыціць МСК сінтэтычнымі мікракапсуламі без парушэння структурнай цэласнасці і рухомасці клетак. Клеткі, загружаныя мікракапсулай, захоўвалі сваю рухомасць і здольнасць міграваць праз поры памерам 8 мікраметраў, што дазваляе іх выкарыстоўваць у якасці носьбіта для адраснай дастаўкі мікракапсуліраваных прэпаратаў і біялагічных малекул, напрыклад, нуклеінавых кіслот.

У найбліжэйшы час навукоўцы правядуць апрабацыю тэхналогіі мікракапсулявання з рознымі лекавымі сродкамі і біялагічнымі малекуламі, якія валодаюць тэрапеўтычнымі ўласцівасцямі пры лячэнні розных захворванняў.

Звязда, 10 сакавіка 2022