Ініцыіраваная Беларуссю рэзалюцыя "Устойлівае прамысловае развіццё ў краінах з сярэднім узроўнем даходу" прынята 1-га снежня на падагульняючым пленарным пасяджэнні 17-й сесіі Генеральнай канферэнцыі Арганізацыі Аб`яднаных Нацый па прамысловым развіцці (ЮНІДА).

Рэзалюцыя закладвае аснову для паступальнага пашырэння ўзаемадзеяння ЮНІДА з краінамі з сярэднім узроўнем даходу. Ключавым элементам дакумента з`яўляецца даручэнне сакратарыяту арганізацыі распрацаваць стратэгічныя рамкі супрацоўніцтва з названай групай дзяржаў для садзейнічання іх устойліваму прамысловаму развіццю.

Закрываючы сесію, генеральны дырэктар ЮНІДА Лі Ёнг выказаў задаволенасць прыняццем гэтай рэзалюцыі, падкрэсліўшы, што ў краінах з сярэднім узроўнем даходу пражывае дзве трэці насельніцтва планеты і іх устойлівае прамысловае развіццё з`яўляецца важнай перадумовай для дасягнення мэт Парадку дня ў галіне ўстойлівага развіцця на перыяд да 2030 года.

1 снежня 2017, Вена
БЕЛТА