25—26 лістапада ў Алматы адбыліся V Рэгіянальныя экспертныя кансультацыі прадстаўнікоў практычных падраздзяленняў па барацьбе з тэрарызмам і іншымі гвалтоўнымі праявамі экстрэмізму органаў бяспекі і спецыяльных службаў дзяржаў — удзельніц СНД. 

Асноўнымі тэмамі для абмеркавання сталі пытанні процідзеяння тэрарызму і гвалтоўнаму экстрэмізму ў краінах СНД, яго прафілактыка ва ўмовах узрастання агульных пагроз, якія зыходзяць ад дзейнасці міжнародных тэрарыстычных арганізацый "Ісламская дзяржава", "Джэбхат ан-Нусра", "Рух Талібан", "Ісламская партыя Туркестана — Ісламскі рух Узбекістана" і інш. 

У зоне асаблівай увагі ўдзельнікаў кансультацый былі актуальныя праблемы процідзеяння распаўсюджванню радыкальнага ісламу сярод насельніцтва, а таксама вярбовачнай дзейнасці міжнародных тэрарыстычных арганізацый у дачыненні да грамадзян; асаблівасці арганізацыі ўзаемадзеяння кампетэнтных органаў дзяржаў — удзельніц СНД з прадстаўнікамі духавенства і рэлігійнымі інстытутамі; роля і месца сучаснай сістэмы адукацыі ў вырашэнні задач па процідзеянні распаўсюджванню рэлігійнага экстрэмізму і тэрарызму, у прыватнасці, на прыкладзе дзяржаў СНД Цэнтральна-Азіяцкага рэгіёну. 

Прапановы і рэкамендацыі па лініі скаардынаванай працы органаў бяспекі, спецыяльных службаў і праваахоўных органаў дзяржаў — удзельніц СНД па пытаннях забеспячэння нацыянальнай бяспекі, скіраваныя на зніжэнне тэрарыстычных пагроз і іншых гвалтоўных праяў экстрэмізму ў дзяржавах Садружнасці, увайшлі ў выніковы дакумент сустрэчы. 

Беларусь на кансультацыях прадстаўлялі спецыялісты Камітэта дзяржаўнай бяспекі, якія адказваюць за кірунак антытэрору.

Вячаслаў Будкевіч, БелаПАН
Мінск, 26 лістапада 2015