Прадстаўнік Беларусі спявак Тэа (Юрый Вашчук) заняў 16-е месца на міжнародным конкурсе песні "Еўрабачанне-2014", фінал якога адбыўся вечарам 10 мая ў Капенгагене (Данія).
Конкурс выйграла Канчыта Вурст з Аўстрыі (сапраўднае імя Томас Нойвірт), якая набрала 290 балаў, другое месца заняў гурт The Common Linnets з Нідэрландаў (238), трэцяе — Сана Нільсен са Швецыі (218).
Тэа выконваў песню Cheesecake і выступіў у фінале пад другім нумарам, набраўшы 43 балы. Найвышэйшую ацэнку ў 12 балаў Беларусь атрымала ад Расіі, 8 балаў — ад Арменіі, 7 балаў — ад Азербайджана, 6 балаў — ад Украіны, 5 балаў — ад Малдовы, 3 балы — ад Літвы і па адным бале — ад Чарнагорыі і Ізраіля.
Беларусь аддала 12 балаў Расіі, 10 балаў — Арменіі, 8 балаў — Украіне. Вынікі галасавання абвяшчала Алёна Ланская.
Замежныя букмекеры з самага пачатку аддавалі перамогу на "Еўрабачанні-2014" прадстаўніку Арменіі Араму Мр3, аднак пасля выступлення ў першым паўфінале рэйтынгі букмекерскіх кантор узначаліла шведка Сана Нільсен. Пасля заканчэння другога паўфіналу ў фаварыты таксама выйшла Канчыта Вурст з Аўстрыі. Беларусь у рэйтынгах букмекераў займала апошнія месцы.
Сёлета "Еўрабачанне" праходзіла на сцэне B&W Hallerne Капенгагена пад лозунгам "Далучайцеся да нас". Усяго ў конкурсе бралі ўдзел 37 краін. Беларусь удзельнічала ў "Еўрабачанні" 11 разоў і чацвёрты раз выступала ў фінале. Найлепшы вынік за ўсю гісторыю ўдзелу Беларусі ў конкурсе быў дасягнуты Дзмітрыем Калдуном, які ў 2007 годзе заняў у фінале шостае месца.
Анастасія Салановіч,
БелаПАНМінск, 11 мая 2014
