Галасаванне па рэзалюцыі адбылося 13 чэрвеня на сесіі Савета ААН па правах чалавека (СПЧ) у Жэневе. За прыняцце рэзалюцыі прагаласавалі 26 краін, супраць — тры, 18 — устрымаліся.

"Савет пастанаўляе працягнуць на адзін год мандат спецыяльнага дакладчыка па пытанні аб сітуацыі ў галіне правоў чалавека ў Беларусі і просіць спецыяльнага дакладчыка прадставіць даклад аб сітуацыі ў галіне правоў чалавека ў Беларусі Савету па правах чалавека на яго дваццаць шостай сесіі Генеральнай асамблеі — на яе шэсцьдзесят дзявятай сесіі", — гаворыцца ў рэзалюцыі.

У рэзалюцыі выказваецца глыбокая занепакоенасць у сувязі з "парушэннямі правоў чалавека ў Беларусі, якія працягваюцца і якія носяць структурны і эндэмічны характар, а таксама сістэмных і сістэматычных абмежаванняў правоў чалавека, асабліва ў адносінах да свабоды асацыяцый, сходаў і права на свабоду думак і іх свабоднае выказванне".

Савет па правах чалавека таксама занепакоены "прымяненнем катаванняў і жорсткім абыходжаннем у месцах утрымання пад вартай, адсутнасцю рэакцыі ўрада на выпадкі насільных знікненняў палітычных апанентаў, парушэннямі працоўных правоў, раўназначнымі прымусовай працы, значнымі прагаламі ў антыдыскрымінацыйным заканадаўстве, беспакаранасцю асоб, якія парушаюць і ўшчамляюць правы чалавека, прыцясненнем арганізацый грамадзянскай супольнасці, праваабаронцаў, журналістаў і палітычных апанентаў, аказаннем націску на адвакатаў, няўдзелам апазіцыйных палітычных партый у працы парламента".

Савет рэкамендуе ўраду Беларусі правесці "ўсёабдымны агляд заканадаўства, палітыкі, стратэгій і практыкі для таго, каб нормы былі ясна вызначаныя, адпавядалі міжнароднаму праву і абавязацельствам краіны ў сферы правоў чалавека і не выкарыстоўваліся, каб перашкодзіць або празмерна абмяжоўваць любыя правы чалавека, уключаючы свабоду выказвання меркаванняў, асацыяцыі і мірных сходаў і свабоду сродкаў масавай інфармацыі".

У рэзалюцыі СПЧ настойліва заклікае беларускае кіраўніцтва неадкладна і безагаворачна вызваліць і рэабілітаваць усіх палітычных зняволеных, а таксама рэабілітаваць тых, хто ўжо свабодны.

Савет заклікае ўлады Беларусі ў поўнай меры супрацоўнічаць са спецдакладчыкам ААН, у тым ліку шляхам давання яму доступу для наведвання краіны і доступу да патрэбнай інфармацыі.

Перад галасаваннем па рэзалюцыі выступілі прадстаўнік Беларусі пры ААН у Жэневе Міхаіл Хвастоў, а таксама прадстаўнікі Эквадора і Венесуэлы.

Хвастоў заявіў, што Беларусь ведае, як абараняць правы чалавека, бо з`яўляецца незалежнай краінай з ужо сфарміраванай палітычнай сістэмай.

Прадстаўнік Венесуэлы зазначыў, што яго краіна катэгарычна не дапускае палітычныя маніпуляцыі праз тэматыку правоў чалавека.

Прадстаўнік Эквадора, які ўстрымаўся, заявіў, што факты, выкладзеныя ў справаздачы спецдакладчыка па Беларусі, не даюць разумення сітуацыі ў краіне.

Справаздача спецдакладчыка па сітуацыі ў Беларусі Міклаша Харашці была заслухана на сесіі 4 чэрвеня. Яшчэ тады пры абмеркаванні даклада Хвастоў заявіў, што Беларусь не мае патрэбы ў спецыяльным дакладчыку ці іншых такога кшталту інстытутах. Ён зазначыў, што гэты даклад выкарыстоўваецца для аказання палітычнага і эканамічнага націску на Беларусь.

"Беларускі народ не мае патрэбы ў спецдакладчыку. Мы ведаем, якія ў нас ёсць праблемы, і гатовыя іх вырашаць. У нас ёсць свая мадэль, заснаваная на нацыянальным суверэнітэце, бяспецы і вяршэнстве закона. Мы адхіляем усе абвінавачанні, якія ўтрымліваюцца ў дакладзе, і заяўляем, што высновы даклада для нас непрымальныя", — сказаў афіцыйны прадстаўнік Беларусі.

Захар Шчарбакоў, БелаПАН
Мінск, 13 чэрвеня 2013