У Выканаўчым камітэце СНД у Мінску 12—13-га снежня пройдзе пасяджэнне экспертнай групы па дапрацоўцы і ўзгадненні праектаў пратакола аб унясенні зменаў у Канвенцыю аб прававым статусе працаўнікоў-мігрантаў і членаў іх сем`яў дзяржаў — удзельніц Садружнасці і пагаднення аб сацыяльным забеспячэнні (сацыяльным страхаванні) працаўнікоў-мігрантаў і членаў іх сем`яў.

Канвенцыя была прынята кіраўнікамі ўрадаў краін Садружнасці ў лістападзе 2008 года ў Кішынёве. Дакумент падпісалі дзевяць дзяржаў: Азербайджан, Арменія, Беларусь, Казахстан, Кыргызстан, Расія, Таджыкістан, Узбекістан і Украіна.

Як паведаміла прэс-служба выканкама, асноўная мэта канвенцыі — садзеянне стварэнню ўмоў для забеспячэння ўрэгуляванага прававога становішча працаўнікоў-мігрантаў і членаў іх сем`яў і рэалізацыя прынцыпу роўнага абыходжання ў дачыненні да працаўнікоў-мігрантаў і грамадзян прымаючай дзяржавы ва ўсім, што звязана з умовамі жыцця і працы.

У адпаведнасці з дакументам працоўныя-мігранты карыстаюцца на тэрыторыі боку, які прымае, тымі ж правамі, што і яе грамадзяне. Так, яны маюць права на бяспечныя ўмовы працы, роўнае ўзнагароджанне за раўназначную працу, карыстанне жыллём на бязвыплатнай аснове, сацыяльнае забеспячэнне (сацыяльнае страхаванне), акрамя пенсіённага, абавязковае сацыяльнае страхаванне ад няшчасных выпадкаў на вытворчасці і прафесійных захворванняў, а таксама кампенсаванне ўрону, прычыненага жыццю і здароўю ў выніку іх, доступ да іншай аплатнай працоўнай дзейнасці ў выпадку яе страты па не залежных ад працаўніка-мігранта абставінах.

На сёння канвенцыя набыла моц для ўсіх падпісаўшых яе бакоў, акрамя расійскага, таджыкскага і ўзбекскага.

У кастрычніку 2011 года ў Выканкам СНД паступіла нота расійскага боку з прапановай разгледзець праекты пратакола аб унясенні паправак у канвенцыю і пагаднення аб сацыяльным забеспячэнні (сацыяльным страхаванні) працаўнікоў-мігрантаў і членаў іх сем`яў. Першае экспертнае пасяджэнне па гэтых пытаннях адбылося ў сакавіку гэтага года ў Мінску. На другім пасяджэнні эксперты краін Садружнасці прадоўжаць работу па ўзгадненні тэкстаў дакументаў.

Вячаслаў Будкевіч, БелаПАН
Мінск, 10 снежня 2012