Тысячы жыхароў Армэніі, Карабаху, армян дыяспары і замежных гасьцей наведалі мэмарыяльны комплекс ў Ерэване, каб аддаць даніну павагі памяці 1500000 армян, якія сталі ахвярамі генацыду ў Асманскай Турцыі.
У першай палове дня мэмарыяльны комплекс наведаў прэзыдэнт Армэніі Серж Саргсян, іншыя афіцыйныя асобы, прадстаўнікі вядучых палітычных сілаў краіны.
У звароце прэзыдэнта Армэніі Сержа Саргсяна ў сувязі з гэтай трагічнай гадавінай, у прыватнасьці, гаворыцца: «Сёньня мы, як вельмі многія ва ўсім сьвеце, схіляем галовы перад памяцьцю бязьвінных ахвяраў генацыду армян. І на сьценах мэмарыяльнага комплексу мы нічога не напісалі, таму што ніводнае слова ня можа выказаць тое, што адбылося, тое, што мы адчуваем ».
Напярэдадні ўвечары ў Ерэване тысячы людзей з транспарантамі і дзяржаўнымі сьцягамі сабраліся ў цэнтры гораду, каб выказаць свой пратэст палітыцы адмаўленьня генацыду, якую праводзіць Турцыяй. Пасьля праведзенага мітынгу і спаленьня турэцкага сьцягу людзі рушылі да мэмарыяльнага комплексу.
Больш за два дзесяткі краінаў сьвету, у тым ліку Ўругвай, Францыя, Расея, Швайцарыя, Канада, Аргентына, а таксама шэраг уплывовых міжнародных арганізацый афіцыйна прызналі масавыя забойствы армян у Асманскай Турцыі ў пачатку мінулага стагодзьдзя генацыдам. Аднак цяперашні турэцкі ўрад, як і яго папярэднікі, адмаўляе факт генацыду.
Радыё Свабода 24 красавіка 2012
