Кіроўца трактара цудам застаўся жывы, але атрымаў траўмы, пасля наезду на міны на ўкраінска-беларускай мяжы, паведамляюць telegram-каналы.
Каля 16:00 4 жніўня за тры кіламетры ад беларускага пункта пропуску "Верхні Церабяжоў" (Столінскі раён) на ўкраінскай тэрыторыі прагрымелі два выбухі.
"Наступствы ўдарнай хвалі адчуваліся жыхарамі прыгранічнай тэрыторыі", - адзначаецца ў паведамленні.
Па папярэдняй інфармацыі, трактар з боку Украіны наехаў на супрацьтанкавыя міны, якія былі ўстаноўлены на сельскагаспадарчых угоддзях.
Гэта не першы сур’ёзны інцыдэнт на мяжы з Украінай у апошні час. Напрыклад, у ліпені беларускія пагранічнікі перахапілі ўкраінскі беспілотнік у Брагінскім раёне з дапамогай радыёэлектроннай стрэльбы.
У чэрвені ўкраінскі беспілотнік з боепрыпасам збілі на ўчастку Гомельскай пагрангрупы.
"Нарад ужыў штатную зброю, пасля чаго на дроне здэтанаваў замацаваны элемент", - гаварылася ў паведамленні Дзяржпагранкамітэта.
У кастрычніку 2022 года ўкраінскія вайскоўцы таксама ладзілі правакацыі. Камеры відэаназірання знялі рух у бок мяжы з Беларуссю ўкраінскага БТР-80 з групай узброеных людзей у форме. Баявая машына спынілася перад інжынернымі загародамі, а затым з’ехала назад углыб украінскай тэрыторыі.
