Мерапрыемствы, прымеркаваныя да 70-годдзя хатынскай трагедыі, адбыліся 8 жніўня ў германска-расійскім музеі "Берлін—Карлсхорст" (былы Музей капітуляцыі).
Як паведамляе прэс-служба МЗС Беларусі, адкрылася выстава "Хатынь — святыня нацыянальнай памяці", падрыхтаваная дзяржаўным мемарыяльным комплексам "Хатынь" пры падтрымцы шэрагу архіўных устаноў краіны. Адбылася панэльная дыскусія "Спаленыя вёскі: Хатынь 1943 — падзея і памяць пра яе ў Рэспубліцы Беларусь", арганізаваная пасольствам Беларусі ў ФРГ сумесна з музеем "Берлін—Карлсхорст".
Дырэктар мемарыяльнага комплекса "Хатынь" Артур Зельскі і нямецкі гісторык беларускага паходжання Алена Тэмпер азнаёмілі аўдыторыю з гісторыяй хатынскай трагедыі і мемарыяльнага комплекса "Хатынь", а таксама "адказалі на шматлікія пытанні па такіх тэмах, як культура памяці пра Вялікую Айчынную вайну ў сучаснай Беларусі, шляхі пашырэння ў Германіі інфармаванасці аб злачынствах, здзейсненых акупантамі на беларускай зямлі".
Мерапрыемства сабрала каля 100 удзельнікаў, сярод якіх былі дэпутат бундэстага Ілля Зайферт, прадстаўнікі дыпламатычнага корпуса, навуковых і культурных колаў.
Падчас знаходжання ў Германіі дырэктар ДМК "Хатынь" наведаў дакументацыйны цэнтр гісторыі прымусовай працы "Берлін—Шонэвайдэ", мемарыяльны комплекс "Заксэнхаўзэн", правёў перамовы з кіраўнікамі фондаў "Брандэнбургскія мемарыялы" Гюнтэрам Моршам, "Тапаграфія тэрора" (Берлін) Андрэасам Нахамам. Абмеркаваны магчымасці двухбаковага супрацоўніцтва і рэалізацыі сумесных праектаў.
БелаПАН Мінск, 10 жніўня 2013
