"Шанхайская арганізацыя супрацоўніцтва па запрашэнні Міністэрства замежных спраў Рэспублікі Беларусь прыняла ўдзел у міжнародным назіранні за ходам падрыхтоўкі і правядзення выбараў Прэзідэнта Рэспублікі Беларусь. Наша місія працавала на працягу пяці дзён - з 22 студзеня. Запрашэнне міжнародных наглядальнікаў расцэньваецца місіяй як імкненне кіраўніцтва Рэспублікі Беларусь забяспечыць максімальную адкрытасць, празрыстасць і дэмакратычнасць прэзідэнцкіх выбараў, а таксама як імкненне ўлічваць меркаванне міжнародных наглядальнікаў з мэтай далейшага ўдасканалення выбарчага працэсу", - сказаў Нурлан Ермекбаеў.

Кіраўнік місіі наглядальнікаў ШАС адзначыў, што ў складзе місіі акрэдытаваны 17 наглядальнікаў з сямі дзяржаў - членаў ШАС. "У асноўным гэта вопытныя прадстаўнікі заканадаўчых, выканаўчых, выбарчых органаў дзяржаў - членаў ШАС, дыпламатычныя работнікі пасольстваў у Мінску, а таксама службовыя асобы сакратарыята", - падкрэсліў ён.

У асноўны дзень галасавання члены місіі наглядальнікаў ШАС прыбылі на выбарчыя ўчасткі да іх адкрыцця, прысутнічалі пры падрыхтоўцы бюлетэняў, пламбіраванні стацыянарных і пераносных скрынь для галасавання. У мэтах атрымання найбольш поўнай і комплекснай карціны члены місіі наведалі выбарчыя ўчасткі не толькі ў Мінску, але і Магілёве, Брэсце, Гродне, а таксама населеных пунктах Мінскай, Магілёўскай, Брэсцкай і Гродзенскай абласцей. За час работы члены місіі пабывалі на 109 выбарчых участках. Прычым рабілі гэта без узгаднення з выканаўчымі або выбарчымі органамі Беларусі. Выбар участка ажыццяўляўся членамі місіі самастойна. Якіх-небудзь перашкод члены місіі наглядальнікаў ШАС не назіралі.

"Члены місіі адзначаюць актыўны ўдзел грамадзян у галасаванні і высокі прафесійны ўзровень падрыхтоўкі работнікаў участковых выбарчых камісій. Члены ўчастковых выбарчых камісій забяспечылі неабходныя ўмовы для працэдуры галасавання. Мы бачылі, як да членаў камісіі на выбарчых участках звярталіся і выбаршчыкі, і наглядальнікі - як нацыянальныя, так і міжнародныя. Пры гэтым усе работнікі ўчастковых выбарчых камісій вельмі аператыўна і канкрэтна адказвалі на пытанні, праяўляючы ветлівасць і ўважлівасць. Гэта значыць, дзейнасць выбарчых камісій мела вельмі кваліфікаваны, галосны і незалежны характар. Ва ўчастковых выбарчых камісіях былі прадстаўлены ўсе неабходныя дакументальныя, інфармацыйна-даведачныя матэрыялы", - падкрэсліў Нурлан Ермекбаеў.

Місія ШАС звярнула ўвагу і на высокую актыўнасць моладзі на выбарах Прэзідэнта Беларусі, у тым ліку тых, хто прымаў удзел у галасаванні ўпершыню. Галасаванне ўсюды праходзіла спакойна, у рамках устаноўленага парадку, у прысутнасці прадстаўнікоў сродкаў масавай інфармацыі.

"Члены місіі прысутнічалі таксама пры закрыцці выбарчых участкаў, падліку галасоў, падпісанні пратаколаў выбарчых камісій. У адрас місіі наглядальнікаў скаргаў і заўваг не паступала. Місія канстатуе, што выбары Прэзідэнта Рэспублікі Беларусь адпавядалі патрабаванням выбарчага заканадаўства Рэспублікі Беларусь і прынятым краінай міжнародным абавязацельствам. Парушэнняў норм нацыянальнага заканадаўства, якія ставілі б пад сумненне легітымнасць выбараў і якія маглі аказаць уплыў на вынікі выбараў, місіяй не адзначана. Місія прызнае праведзеныя выбары празрыстымі, дакладнымі і дэмакратычнымі. Па выніках работы нашай місіі наглядальнікаў прынята заява, якая адобрана ўсімі членамі місіі. Тэкст заявы будзе перададзены Цэнтральнай выбарчай камісіі Рэспублікі Беларусь і апублікаваны ў сродках масавай інфармацыі", - рэзюмаваў Нурлан Ермекбаеў.

27 студзеня 2025, Мінск
БЕЛТА