Урад Нідэрляндаў паведаміў, што два галяндзкія зьнішчальнікі F16 перахапілі расейскі транспртны самалёт, які заляцеў у міжнародную паветраную прастору на поўнач ад Эстоніі і Літвы без інфармаваньня пра плян палёту.
«Блізкія сутыкненьні» Расеі з Захадам балянсуюць на мяжы вайны
За апошнія восем месяцаў адбылося амаль 40 небясьпечных інцыдэнтаў, у якія былі замешаныя вайсковыя сілы Расеі і Захаду.
У Нігерыі затрыманы расейскі самалёт са зброяй на борце
Самалёт зьдзейсьніў вымушаную пасадку ў горадзе Кано на поўначы Нігерыі. На яго борце была знойдзеная незадэкляраваная зброя.
Расейскі ваенны самалёт праляцеў над караблямі НАТА ў Балтыйскім моры, дзе праходзяць маштабныя вучэньні сэрыі Allied Shield. Паводле амэрыканскай тэлекампаніі CNN, самалёт-выведнік імгненна наблізіўся на адлегласьць каля 150 мэтраў і быў зафіксаваны экіпажам эсьмінца USS Jason Dunham.
Паводле крыніцы тэлеканалу ў Пэнтагоне, інцэдэнт з удзелам чатырох караблёў НАТА, у тым ліку амэрыканскага эсьмінца Jason Dunham, адбыўся 11 чэрвеня ў Балтыйскім моры.
«Прадстаўнік ваеннага ведамства ЗША заявіў, што Dunham быў часткай групы з чатырох караблёў, у якую таксама ўваходзілі брытанскі, францускі і нямецкі караблі. Расейскі самалёт пралятаў над палубай аднаго з караблёў НАТА на вышыні толькі 500 футаў (каля 152 мэтраў)», — паведамляе тэлеканал.
У Пэнтагоне адзначылі: «Мы ня лічым гэта бясьпечным і прафэсійным. Мы лічым, што гэта звычайны выпадак, але мы на мяжы таго, каб адчуць дыскамфорт».
Паводле прадстаўніка абароннага ведамства, ніводзін з караблёў «не адчуў наўпроставую пагрозу» у сувязі зь нізкім палётам расейскага самалёта, аднак ён праляцеў «ніжэй і бліжэй», чым звычайна.
Раней тэлеканал паведамляў, што 30 траўня зьнішчальнік ВПС Расеі праляцеў у небясьпечнай блізкасьці ад самалёта-выведніка ЗША над Чорным морам.
Крыніцы тэлеканалу адзначылі, што амэрыканскі самалёт не выконваў манэўру адхіленьня падчас інцэдэнту.
Раней ЗША выказалі Расеі пратэст у сувязі з інцэдэнтам, які адбыўся 7 красавіка над Балтыкай, калі расейскі зьнішчальнік Су-27 перахапіў амэрыканскі самалёт-выведнік RC-135U.
У канцы студзеня расейскі амбасадар быў выкліканы ў брытанскі МЗС для тлумачэньняў з нагоды палёту расейскіх ваенных самалётаў над Ла-Маншам ў міжнароднай паветранай прасторы побач з тэрыторыяй Вялікабрытаніі.
Радыё Свабода, 14 чэрвеня 2015
