"Ніхто мяне не скінуў. Я вымушаны быў пакінуць Украіну пад непасрэднай пагрозай свайго жыцця. Уладу захапілі прафашысцкія нацыяналістычныя малойчыкі, якія прадстаўляюць меншаць жыхароў Украіны, — сказаў ён. — Усё, што адбылося, — вынік безадказнай палітыкі Захаду, які патураў Майдану. Я верыў у прыстойнасць замежных пасрэднікаў. Нягледзячы на тое што пагадненне (паміж Януковічам і прадстаўнікамі апазіцыі пры пасрэдніцтве Захаду. — БелаПАН.) было супярэчлівым і цяжкім, я яго падпісаў, як і лідары апазіцыі, і прадстаўнікі замежных дзяржаў".

Выхадам з наяўнай сітуацыі Януковіч бачыць поўнае выкананне падпісанага пагаднення, "неадкладны пачатак і завяршэнне ў верасні 2014 года канстытуцыйнай рэформы, затым правядзенне прэзідэнцкіх выбараў, непрадузятае расследаванне фактаў насілля пад маніторынгам прадстаўнікоў улады, апазіцыі і Савета Еўропы". Апрача таго, ён лічыць неабходным поўную здачу зброі пратэстоўцамі, разблакіроўку вуліц і плошчаў, вызваленне захопленых будынкаў.

Януковіч таксама заявіў, што лічыць неабходным правядзенне ўсенароднага рэферэндуму, пытанні для якога "неабходна ў самы бліжэйшы час сфарміраваць з удзелам шырокага кола грамадскасці".

На пытанне журналіста, ці сорамна яму "хоць за штосьці", Януковіч адказаў: "Сорамна. Хачу папрасіць прабачэння ў ветэранаў і ўкраінскага народа за тое, што адбылося ва Украіне, што ў мяне не хапіла сіл утрымаць стабільнасць і дапусціць тое бязмежжа, якое зараз творыцца ў краіне".

Януковіч таксама заявіў, што нікуды не ўцякаў. "З Кіева я пераехаў у Харкаў. Калі быў у Кіеве, пры пераездзе мяне абстралялі з аўтаматычнай зброі. У Харкаў мы ехалі сустракацца з актывам "Партыі рэгіёнаў" і грамадскіх арганізацый", — расказаў ён.

На просьбу растлумачыць, што ён робіць у Растове, Януковіч сказаў: "У Растове я таму, што ў мяне недалёка тут жыве стары сябар. Прыехаў да яго, каб знайсці часовае прыстанішча. У Расію трапіў, дзякуючы патрыятычна настроеным афіцэрам, якія выканалі свой абавязак і дапамаглі мне захаваць жыццё".

Каментуючы сітуацыю ў Крыме, экс-прэзідэнт зазначыў: "У Крыме зараз абсалютна натуральная рэакцыя на той бандыцкі пераварот, які адбыўся ў Кіеве. Крымчане не будуць падпарадкоўвацца нацыяналістам і бендэраўцам. Крым павінен заставацца ў складзе Украіны, захоўваючы шырокую аўтаномію".

Пры гэтым ён падкрэсліў, што "любыя ваенныя дзеянні ў такой сітуацыі недапушчальныя. Януковіч таксама заявіў, што не збіраецца звяртацца па ваенную падтрымку да Расіі, а ва Украіну вернецца, як толькі "будуць выкананыя ўмовы" яго бяспекі і бяспекі яго сям`і.

Паводле слоў Януковіча, з Пуціным ён не сустракаўся, але пасля прыезду ў Расію ў іх адбылася тэлефонная размова: "Дамовіліся, што як толькі ва Уладзіміра Уладзіміравіча будзе магчымасць сустрэцца са мною, гэтая сустрэча адбудзецца".

Януковіч таксама заявіў, што прызначаныя на 25 мая прэзідэнцкія выбары ва Украіне не лічыць законнымі і браць у іх удзелу не будзе.

Пытанне аб арышце ў Швейцарыі яго рахункаў і рахункаў бліжэйшага атачэння Януковіч спачатку праігнараваў, аднак потым заявіў: "Што да нейкіх там сродкаў, грошай, уласнасці за мяжой: у мяне ніколі ніякай уласнасці не было, я ёй не валодаў. У мяне ніколі не было ніякіх рахункаў за мяжой. Я публічны чалавек. У мяне ўсё, што было, усё было задэкларавана. І ўсё было на маіх рахунках".

Ён таксама заявіў, што мае намер судзіцца з тымі, хто прысвоіў сабе яго загарадную рэзідэнцыю Межыгор`е, таму што выкупіў гэтую нерухомасць "нейкі час таму". Януковіч паведаміў, што ў Міжыгор`і з`яўляецца афіцыйным уладальнікам дома плошчай 620 кв.м і ўчастка ў 7 га, за які заплаціў 3,2 млн. долараў.

Паводле яго слоў, ён пражывае ў гэтай рэзідэнцыі з 1999 года. Двума ўказамі былога прэзідэнта Леаніда Кучмы, а затым дакументам, падпісаным Віктарам Юшчанкам, дом быў перададзены яму ў вечнае карыстанне, будучы пры гэтым на балансе кіраўніцтва справамі кіраўніка дзяржавы. "Калі прыйшла новая ўлада, яны паспрабавалі мяне высяляць з гэтага дома, але ў выніку паступіла прапанова, каб я яго купіў. І я за яго заплаціў сваімі грашамі, якія ў мяне былі задэклараваныя. Я прадаў усё, што ў мяне было ў той час, і заплаціў", — сказаў Януковіч.

Экс-прэзідэнт таксама дадаў: "Міжнародныя адвакаты вельмі хутка будуць звяртацца ў суды, таму што гэтая ўласнасць не з`яўляецца ўкраінскай. Вось так".

Таццяна Каравянкова, БелаПАН
Мінск, 28 лютага 2014