Праваслаўным і католікам трэба разам захоўваць хрысціянскія каштоўнасці, каб захаваць само хрысціянства. Такі пункт гледжання мітрапаліт Мінска-Магілёўскі арцыбіскуп Тадэвуш Кандрусевіч выказаў 13 лістапада на праваслаўна-каталіцкай канферэнцыі ў Мінску.
"Сёння, калі Еўропа і свет стаяць перад шматлікімі заклікамі сучаснасці да секулярызму і маральнага рэлятывізму, час раскідваць камяні ўжо прайшоў. Мы — хрысціяне, нас аб`ядноўвае больш, чым раздзяляе", — зазначыў Кандрусевіч.
Паводле яго слоў, асаблівае значэнне праваслаўна-каталіцкай канферэнцыі надае прысутнасць старшыні папскага савета па садзеянні хрысціянскаму адзінству кардынала Курта Коха. Гэты форум, на думку арцыбіскупа, азначае развіццё дыялогу паміж хрысціянскімі канфесіямі ў Беларусі. "Гэта ўжо не першы такі форум, — сказаў ён. — Чатыры гады таму мы праводзілі хрысціянска-ісламскі, а два гады таму — хрысціянска-яўрэйскі форумы. Сёння праводзім паміж сабой".
Кандрусевіч падкрэсліў важнасць правядзення такой вось сустрэчы менавіта ў Беларусі, бо "не так лёгка знайсці месца, дзе такі форум можна было б арганізаваць".
Як заявіў журналістам Рыгор Даўгяла, начальнік цэнтра міжнародных сувязяў і развіцця тэалагічнай адукацыі Інстытута тэалогіі імя Святых Мяфодзія і Кірыла, адметнасцю мерапрыемства з`яўляецца дыялог праваслаўных і католікаў не толькі з Беларусі, але і іншых рэгіёнаў Еўропы.
БелаПАН14 лістапада 2011
