Аляксандр Лукашэнка назваў ашаламляльным вынік на прэзідэнцкіх выбарах у Расіі, паведамляе прэс-служба беларускага лідара.
У нядзелю 17 сакавіка ў Расіі завяршыліся трохдзённыя выбары прэзідэнта. Паводле даных ЦВК пасля апрацоўкі 99,76% пратаколаў, дзеючны кіраўнік дзяржавы Уладзімір Пуцін набірае 87,29% галасоў.
Як паведаміла старшыня Цэнтрвыбаркама РФ Эла Памфілава афіцыйна вынікі выбараў прэзідэнта РФ будуць падведзены ў чацвер, 21 сакавіка.
Па звестках прэс-службы кіраўніка беларускай дзяржавы, у панядзелак, 18 сакавіка, Аляксандр Лукашэнка праводзіць нараду па падрыхтоўцы да пасяджэння VII Усебеларускага народнага сходу.
Перад гэтым мерапрыемствам беларускі лідар паразмаўляў па тэлефоне з Уладзімірам Пуціным.
"Толькі што перагаварыў з Прэзідэнтам Расіі, павіншаваў яго з вынікамі прэзідэнцкіх выбараў у Расійскай Федэрацыі", - прыводзіць словы кіраўніка дзяржавы яго прэс-служба.
Аляксандр Лукашэнка расказаў, што Уладзімір Пуцін прасіў яго выказаць падзяку ўсім, хто дапамог у арганізацыі выбараў у Беларусі.
"Выбары прайшлі як нідзе арганізавана. Як бы ні спрабавалі тут нас качнуць і з Захаду, вельмі добрыя вынікі. Пасольства Расіі вельмі добра працавала ў кантакце з нашымі службовымі асобамі", - падкрэсліў беларускі лідар.
Пасля чаго дадаў, што галасы абсалютнай большасці выбаршчыкаў былі аддадзены за дзеючага прэзідэнта РФ Уладзіміра Пуціна.
"Вядома, вынік ашаламляльны", - пракаменціраваў Аляксандр Лукашэнка.
Ён таксама звярнуў увагу на тое, што была беспрэцэдэнтна высокая яўка выбаршчыкаў.
"Пры высокай яўцы такія вынікі ў нейкай ступені нават нечаканыя", - дадаў беларускі лідар.
Аляксандр Лукашэнка таксама адзначыў, што з гэтага трэба зрабіць некаторыя вывады. У прыватнасці, паводле яго слоў, галоўны ўрок у тым, што народам Расіі і Беларусі нельга навязваць чужую волю – "людзі зробяць наадварот".
"Таму не ўдалося вядомым сілам навязаць гэту волю расіянам, перш за ўсё. Яны малайцы, з’ядналіся ў гэты перадвыбарчы перыяд і паказалі, хто ў доме гаспадар", - канстатаваў Аляксандр Лукашэнка.
Пасля чаго дадаў, што гэта стала сур’ёзным сігналам краінам Захаду, якія рабілі стаўку на тое, "каб расхістаць знутры Расію, не атрымліваецца расхістаць на фронце – значыць, расхістаць знутры" – і гэта таксама не атрымалася.
