Нацыянальны стэнд Беларусі на выстаўцы прадставіць лепшыя прамысловыя распрацоўкі і інавацыйнае абсталяванне флагманаў машынабудаўнічай галіны краіны, паведамляе БЕЛТА са спасылкай на сайт выставачнага прадпрыемства "Белінтэрэкспа" БелГПП.

"У 2021 годзе выстаўка пад брэндам "ІНАПРАМ. Вялікі прамысловы тыдзень ва Узбекістане" з поспехам прайшла ў Ташкенце, заняўшы ўсе чатыры павільёны "УзЭкспаЦэнтра". У ёй прынялі ўдзел 300 кампаній, яна сабрала 10 тыс. прафесійных наведвальнікаў з 14 краін. Беларускі павільён уключыў у сябе стэнды 65 кампаній і арганізацый, а дэлегацыю ўзначаліў міністр прамысловасці Пётр Пархомчык. У выніку работы на выстаўцы беларускія кампанія заключылі экспартныя кантракты на агульную суму $13 млн", - расказалі ў "Белінтэрэкспа".

У 2022 годзе выстаўка праходзіць пад новай назвай - "ІНАПРАМ. Цэнтральная Азія". Мерапрыемства ўключыць шэсць тэматычных раздзелаў: машынабудаванне, металургія, энергетыка, хімія, прамысловая аўтаматызацыя, фармацэўтыка і медыцына.

У рамках выстаўкі запланавана пленарная сесія "Цэнтральная Азія. Прастора тэхналагічнага прарыву". Сярод заяўленых спікераў - міністр прамысловасці і гандлю Расіі Дзяніс Мантураў, намеснік прэм`ер-міністра Узбекістана па пытаннях інвестыцый і знешнеэканамічных сувязей - міністр інвестыцый і знешняга гандлю Узбекістана Сардор Умурзакаў. Плануюцца таксама спецыялізаваныя сесіі па інфраструктурных праектах, лагістыцы, фінансавых інструментах, адукацыі.

На мерапрыемства запрошаны "баеры" з краін Цэнтральнай Азіі: Казахстана, Кыргызстана, Таджыкістана, Туркменістана, Афганістана і Пакістана. Чакаецца, што маючае адбыцца мерапрыемства наведаюць больш за 10 тыс. чалавек.

У "Белінтэрэкспа" таксама паведамілі, што экспарт беларускіх тавараў ва Узбекістан за пяць гадоў вырас у шэсць разоў. Найбольшым попытам карыстаецца тэхніка з Беларусі (трактары і седлавыя цягачы, грузавыя аўтамабілі), хімічная прадукцыя, прадукты харчавання, чорныя і каляровыя металы, энерганосьбіты, нафтапрадукты. Усяго Беларусь пастаўляе ва Узбекістан 360 таварных пазіцый усіх галін прамысловасці.

Арганізатарам беларускай экспазіцыі на прамысловай выстаўцы "ІНАПРАМ. Цэнтральная Азія" выступае выставачнае прадпрыемства "Белінтэрэкспа" Беларускай гандлёва-прамысловай палаты.

24 студзеня 2022, Мінск
БЕЛТА