Зусім нядаўна ў Ташкенце (Узбекістан) выйшаў паэтычны зборнік Святланы Быкавай «Шэпт зорак». Усе вершы для ўзбекскага зборніка нашай зямлячкі пераклала Дзіларом Абдурахмон. 

З просьбай пракаментаваць падзею звярнуліся да кіраўніка аддзела міжнародных сувязяў Саюза пісьменнікаў Узбекістана вядомага празаіка і перакладчыка Рысалат Хайдаравай. І вось што пачулі ў адказ: 

— Мы з павагай ставімся да развіцця беларуска-узбекскіх сувязяў. У апошні час, дзякуючы найперш Міністэрству інфармацыі Рэспублікі Беларусь, Выдавецкаму дому «Звязда», Саюзу пісьменнікаў Беларусь, былі рэалізаваны многія ініцыятывы па супрацоўніцтву пісьменнікаў нашых краін. Узбекскія літаратары гасцявалі ў Беларусі. Двойчы ў Мінск наведваўся і старшыня нашай пісьменніцкай арганізацыі паэт Сіражыддзін Сайід. У беларускай літаратурнай перыёдыцы, у альманахах «Далягляды» і «Созвучие» друкаваліся творы ўзбекскіх літаратараў. Спадзяюся на працяг гэтай шматграннай мастацкай працы, якая, несумненна, з’яўляецца сведчаннем сапраўднай народнай дыпламатыі, дружбы народаў Узбекістана і Беларусі. 

Сяргей Шычко
Звязда, 10 красавіка 2022