Як паведамляе прэс-служба "Белавія", найбліжэйшы рэйс Мінск — Тэль-Авіў — Мінск адбудзецца 23 ліпеня. Вылет з Мінска запланаваны на 20.00, прылёт у Тэль-Авіў — 23.40 па мясцовым часе, назад самалёт вылеціць 24 ліпеня ў 0.40 і вернецца ў Мінск у 04.25.

Як адзначылі ў "Белавія", прадстаўніцтва авіякампаніі ў Ізраілі і мінскія спецыялісты "працуюць у цесным узаемадзеянні з аэрапортнымі і авіяцыйнымі ўладамі Ізраіля, якія рэгулярна інфармуюць усе авіякампаніі аб сітуацыи з бяспекай палётаў у раёне аэрапорта".

"Мы сочым за сітуацыяй у Ізраілі. У выпадку нязначнай пагрозы мы неадкладна адменім рэйс для забеспячэння бяспекі нашых пасажыраў і экіпажаў", — адзначыў генеральны дырэктар "Белавія" Анатоль Гусараў.

Паведамляецца таксама, што інфармацыі аб закрыцці паветранай зоны ў раёне тэль-авіўскага аэрапорта ці самога аэрапорта, а таксама рэкамендацый па адмене рэйсаў ад авіяцыйных улад Ізраіля не паступала. "Цяпер аэрапорт Бен-Гурыён прымае міжнародныя рэйсы па раскладзе, нягледзячы на гэта, некаторыя авіякампаніі адмянілі рэйсы ў Тэль-Авіў", — гаворыцца ў паведамленні.

"Белавія" выконвае рэгулярныя рэйсы па маршруце Мінск — Тэль-Авіў — Мінск пяць разоў на тыдзень. Апошні такі рэйс быў ажыццёўлены 22 ліпеня.

Некаторыя буйныя авіякампаніі прыпынілі авіярэйсы ў Ізраіль пасля падзення палесцінскай ракеты за некалькі кіламетраў ад тэль-авіўскага аэрапорта. Паводле звестак замежных СМІ, палёт адмянілі амерыканскія кампаніі, кампаніі канцэрна "Люфтганза-груп" (Lufthansa, Germanwings, Austrian Airlines і Swiss), Air France і іншыя. Расійскія кампаніі "Трансаэра" і "Аэрафлот" 22 ліпеня вярнулі ў Маскву самалёты, якія ўжо вылецелі ў Тэль-Авіў.

У сваю чаргу Міністэрства транспарту Ізраіля заклікала замежныя авіякампаніі прадоўжыць палёты ў Тэль-Авіў, адзначыўшы, што аэрапорт Бен-Гурыён "бяспечны і поўнасцю ахоўваецца".

Анастасія Салановіч, БелаПАН
Мінск, 23 ліпеня 2014