Аб гэтым гаворыцца ў пасланнях генеральнага сакратара ААН Пан Гі Муна і вярхоўнага камісара Арганізацыі па правах чалавека Наві Пілэй у сувязі з Міжнародным днём правоў чалавека, які адзначаецца 10 снежня.
Аўтары пасланняў заклікалі ўрады ўсіх краін не блакаваць доступ да інтэрнэта і сацыяльных сетак, спрабуючы тым самым прадухіляць крытыку і грамадскія абмеркаванні.
Пры гэтым Пілэй падкрэслівае: у Тунісе і Каіры, Бенгазі і Дэр`а, а пазней (хаця і ў зусім іншым кантэксце) у Мадрыдзе, Нью-Ёрку, Лондане, Сант`яга і шэрагу іншых гарадоў мільёны людзей з усіх слаёў грамадства мабілізаваліся, каб запатрабаваць ад уладаў паважаць чалавечую годнасць.
"Яны змахнулі пыл з абяцанняў, выкладзеных ва Усеагульнай дэкларацыі правоў чалавека, і запатрабавалі свабоду ад страху і свабоду ад галечы, сфармуляваўшы такім чынам у сціслым варыянце ўсе грамадзянскія, палітычныя, сацыяльна-эканамічныя і культурныя правы, што ўтрымліваюцца ў дэкларацыі", — цытуе прэс-служба ААН вярхоўнага камісара па правах чалавека.
Пан Гі Мун у сваім пасланні падкрэслівае, што сёлета правам чалавека надавалася асаблівая ўвага. Па ўсім свеце ўзнікалі грамадскія рухі за справядлівасць, годнасць, роўнасць і ўдзел — правы, абвешчаныя ва Усеагульнай дэкларацыі правоў чалавека.
Кіраўнік ААН звяртае ўвагу на тое, што ў 2011 годзе была пачаты новыя працэсы дэмакратычных пераўтварэнняў; зроблены новыя захады па прыцягненні да адказнасці вінаватых ва ўчыненні ваенных злачынстваў і злачынстваў супраць чалавечнасці; на новы ўзровень выйшла разуменне саміх правоў чалавека.
Пры гэтым, адзначае Пан Гі Мун, многія людзі, якія імкнуліся адстойваць свае законныя спадзяванні, падтрымлівалі сувязь адзін з адным праз сацыяльныя сеткі.
"Сышлі ў мінулае тыя часы, калі рэпрэсіўныя ўрады маглі поўнасцю кантраляваць патокі інфармацыі. Сёння, кіруючыся прынятымі імі абавязацельствамі выконваць правы на свабоду сходаў і выказванне меркаванняў, урады не павінны блакаваць доступ да інтэрнэту і да розных сацыяльных сетак у якасці метаду папярэджання крытыкі і грамадскіх дэбатаў", — сказана ў пасланні генеральнага сакратара ААН.
Усеагульная дэкларацыя правоў чалавека была зацверджана 10 снежня 1948 года. Гэта базавы дакумент, якім павінны кіравацца ўсе дзяржавы — члены ААН. Дэкларацыя пацвярджае годнасць кожнага чалавека, абвяшчае ўніверсальнасць і непадзельнасць яго правоў, а таксама ўзаемасувязь грамадзянскіх, культурных, эканамічных, палітычных і сацыяльных правоў.
Таццяна Каравянкова,
БелаПАНМінск, 10 снежня 2011
