25 лютага прэзыдэнт ЗША Барак Абама падпісаў распараджэньне ад замарожаньні фінансавых актываў рэжыму Муамара Кадафі, якія знаходзяцца ў амэрыканскіх банках. Амэрыканскія фінансавыя інспэктары ўстанавілі, што пад гэтыя санкцыі падпадаюць 32 мільярды даляраў – сума значна большая, чым яны спачатку меркавалі.
Амэрыканскія банкі абавязаныя рэгулярна дакладваць ураду аб актывах замежнікаў на сваіх рахунках. Паводле апошняга такога дакладу, усе юрыдычныя і фізычныя асобы з краінаў-экспартэраў нафты ў Афрыцы (уключна зь Альжырам, Габонам, Лібіяй і Нігерыяй), трымалі ў амэрыканскіх банках 13,5 мільярда даляраў, піша сёньняшняе выданьне Financial Times.
Адкуль тады ўзяліся 32 мільярды даляраў выключна лібійскіх грошай і каштоўных папераў?
Па-першае, амэрыканскія фінансавыя інспэктары высьветлілі, што лібійскія грошы ў шматлікіх выпадках апынуліся ў амэрыканскіх банках праз ланцужок банкаў-пасярэднікаў і рахункаў-пасярэднікаў (гэтак званых "амнібусных" рахункаў). Інакш кажучы, лібійскі ўрад мог разьмясьціць свае аблігацыі ў нямецкіх або швайцарскіх банках, а яны апынуліся ў банкаўскай сыстэме ЗША ў выніку далейшых фінансавых апэрацый згаданых банкаў у Нямеччыне і Швайцарыі.
Па-другое, згаданыя рэгулярныя даклады амэрыканскіх банках аб рахунках замежнікаў датычаць адно актываў ня меншых за 100 мільёнаў даляраў. А замарожаньне лібійскіх актываў датычыць усіх сумаў бяз вынятку. Гэта таксама паўплывала на тое, што сума заблякаваных лібійскіх актываў выявілася нечакана высокай.
Радыё Свабода7 сакавіка 2011
