Касманаўт, герой Расіі Алег Навіцкі назваў вельмі важным для развіцця расійскай пілатуемай касманаўтыкі запуск аўтаматычнай станцыі "Месяц-25" і адзначыў, што сам гатовы паляцець на Месяц.
"Чаму не, калі Радзіма даверыць, касманаўт адкажа "ёсць", ― заявіў Навіцкі, адказваючы на пытанне, ці гатовы ён сам ляцець, калі пачнуцца пілатуемыя палёты на Месяц.
Паводле яго слоў, пакуль рана казаць аб дакладных тэрмінах, калі на Месяц накіруецца пілатуемая місія, але гэта найбліжэйшыя гады.
"Невыканальных рашэнняў няма, трэба сабраць разам волю, веды, добрых адукаваных людзей, тых, хто мог бы гэта зрабіць (палёт на Месяц) і, у прынцыпе, гэта ўсё магчыма", ― сказаў Навіцкі і дадаў: "Калі Радзіма скажа ― паляцім”.
Ураджэнец Беларусі таксама лічыць, што "месячная" праграма будзе паспяховай, а палёты рэгулярнымі.
"Я вельмі рады нашай месячнай праграме, рады, што стварылі чарговую станцыю "Месяц - 25", што яна паспяхова стартавала. Я больш чым упэўнены, што цяпер гэтыя палёты будуць рэгулярнымі", ― сказаў Навіцкі.
Паводле яго слоў, у працэсе цяперашняй місіі на Месяц з`явіцца шмат карыснай інфармацыі, і гэта будзе добры задзел на перспектыўныя пілатуемыя палёты.
Навіцкі таксама лічыць, што місія "Месяц-25" ― гэта новая старонка ў расійскай касманаўтыцы, якая "грунтуецца на распрацоўках папярэднікаў" і на шматгадовым паспяховым досведзе.
"Гэта ўдалы сімбіёз назапашанай практыкі і сучасных тэхналагічных рашэнняў", ― сказаў ён. Адказваючы на пытанне аб тым, калі можа быць першы пілатуемы палёт на Месяц расійскай станцыі, Навіцкі зазначыў, што сённяшні палёт таксама наблізіць гэты момант.
"Хацелася б сказаць, што заўтра пасля абеду", ― пажартаваў касманаўт і дадаў сур`ёзна: "Трэба распрацаваць стратэгію па палётах, па тэхніцы, і на гэтым будуць грунтавацца пілатуемыя палёты. У любым выпадку, зараз здзяйсняецца задзел на будучыню".
