Пад кіраўніцтвам начальніка сувязі Узброеных сіл — начальніка ўпраўлення сувязі Генеральнага штаба УС Беларусі генерал-маёра Генадзя Казакова 1—5 чэрвеня праводзяцца кантрольныя заняткі па тактыка-спецыяльнай падрыхтоўцы з асабовым складам злучэння, вайсковых часцей і падраздзяленняў сувязі УС. 

Галоўная мэта мерапрыемства — забеспячэнне арганізаванага разгортвання і ўстойлівага функцыянавання сістэмы сувязі і кіравання войскамі падчас выканання задач па прызначэнні. 

Заняткі стануць адным з этапаў практычнай падрыхтоўкі войскаў сувязі да сумесных аператыўных вучэнняў "Шчыт Саюза — 2015", падчас якіх будзе разгорнутая сістэма сувязі, якая ўключае ў сябе новыя і мадэрнізаваныя сродкі і комплексы сувязі, прынятыя на ўзбраенне Узброеных сіл. 

Падчас кантрольных заняткаў асабовы склад ужо выканаў задачы па арганізаваным руху воінскіх часцей і падраздзяленняў сувязі ў раёны разгортвання вузлоў і ліній сувязі. Цяпер вузлы сувязі пунктаў кіравання ажыццяўляюць набор сувязяў у інтарэсах вузлоў сувязі рухомых пунктаў кіравання. Удзельнікам заняткаў таксама неабходна выканаць нарматывы па разгортванні палявых вузлоў сувязі рухомых пунктаў кіравання Узброеных сіл, ВПС і войскаў СПА, сіл спецыяльных аперацый і аператыўных камандаванняў, злучэнняў і воінскіх часцей у прызначаных раёнах, а таксама забяспечыць узаемадзеянне сістэмы сувязі Узброеных сіл з сеткай электрасувязі агульнага карыстання краіны.

Вячаслаў Будкевіч, БелаПАН
Мінск, 1 чэрвеня 2015