Ва ўпраўленні Следчага камітэта па Мінску рыхтуецца даручэнне праваахоўным органам Казахстана аб правядзенні следчых дзеянняў на тэрыторыі гэтай дзяржавы з удзелам падазроных у двайным забойстве ў беларускай сталіцы.

Нагадаем, двое невядомых мужчын былі знойдзены мёртвымі з нажавымі раненнямі 10 снежня 2012 года на здымнай кватэры на вуліцы Мірашнічэнкі ў Мінску. 15 снежня быў апазнаны грамадзянін Казахстана, жыхар Астаны 1979 года нараджэння, 17 снежня — грамадзянін Расіі, жыхар Омска 1979 года нараджэння. Абодвух апазналі сёстры, якія прыязджалі ў Мінск. Працэдура апазнання праводзілася ў прысутнасці консулаў Казахстана і Расіі. Справа па факце забойства двух чалавек па п. 1 ч. 2 арт. 139 Крымінальнага кодэкса знаходзіцца ў вытворчасці УСК па Мінску. Загінулыя прыехалі ў Мінск для куплі аўтамабіля.

21 студзеня з`явілася неафіцыйная інфармацыя аб тым, што ў Астане затрымана група выкрадальнікаў аўтамабіляў, грамадзян Казахстана, двое з якіх прызналіся ў забойстве ў Мінску ў снежні мінулага года свайго суайчынніка і грамадзяніна Расіі.

Паводле слоў Герасімава, пасля ўчынення забойства з`явіліся падставы меркаваць, што да ўчынення злачынства могуць мець дачыненне двое грамадзян Казахстана, якія прыбылі ў Беларусь днём пазней, чым загінулыя, а затым пакінулі краіну.

Афіцыйны прадстаўнік УСК па Мінску паведаміў, што пры правядзенні аператыўна-вышуковых мерапрыемстваў супрацоўнікамі органаў унутраных спраў Казахстана ў Астане па падазрэнні ў адкрытым крадзяжы аўтамабіля былі затрыманы трое грамадзян Казахстана 1982, 1985 і 1994 гадоў нараджэння. Двое з іх прызналіся ў дачыненні да двайнога забойства на тэрыторыі Беларусі. Цяпер яны прызнаны падазронымі па гэтай крымінальнай справе.

Вячаслаў Будкевіч, БелаПАН
Мінск, 25 студзеня 2013