Рэспандэнтам прапаноўвалася адказаць на пытанне: у якой ступені вы давяраеце беларускаму сегменту інтэрнэту? Давер выказалі 51,4 працэнта апытаных у 2022 годзе (41,7 працэнта — у 2021 годзе).

Пры гэтым сярод іх практычна ў роўнай ступені прадстаўлены пенсіянеры і працуючыя — 55,6 працэнта і 51,5 працэнта адпаведна, крыху менш — навучэнцы (43,6 працэнта). Не давяралі беларускаму сегменту інтэрнэту 19,5 працэнта рэспандэнтаў. Гэта пазіцыя на працягу двух перыядаў сацдаследаванняў засталася нязменнай.

Расійскаму сегменту інтэрнэту давяралі 40,9 працэнта апытаных у 2021 годзе і 47,7 працэнта ў 2022 годзе, не давяралі — 19,1 працэнта і 19,4 працэнта адпаведна.

Міжнароднаму сегменту інтэрнэту давяралі ў 2021 годзе 35,5 працэнта беларусаў, а вось у 2022-м адбыўся спад да 26,9 працэнта. Пазіцыя «не давяраю» вырасла на 8,8 працэнта (у 2021 годзе — 16,7 працэнта, а ў 2022-м ён павялічыўся да 25,5 працэнта).

Інстытут сацыялогіі правёў даследаванні на тэму «Фактары і ўмовы павышэння даверу насельніцтва Беларусі да нацыянальных СМІ». Сацыялагічныя апытанні насельніцтва краіны праводзіліся ў кастрычніку 2021 года і верасні — кастрычніку 2022 года. Метад даследавання — анкетнае апытанне па месцы жыхарства рэспандэнтаў. Аб’ект даследавання — насельніцтва Рэспублікі Беларусь ва ўзросце ад 18 гадоў і старэйшыя. Апытанне праводзілася ва ўсіх абласных цэнтрах краіны, Мінску, раённых і гарадскіх, сельскіх населеных пунктах. Для дасягнення мэт даследавання выкарыстоўвалася рэспубліканская выпадковая шматступеньчатая квотная выбарка.

Аб’ём выбарачнай сукупнасці: 2021 год — 1501 рэспандэнт, 2022 год — 1341.

Звязда, 20 лютага 2023