Прэмію першай ступені "За мір і правы чалавека" Міжнароднага дабрачыннага фонду імя Эміля Чэчкі атрымалі Вераніка Найдзёнава і Марк Брыль з нямецкай арганізацыі "Дзеці Вайны" (Kriegskinder).
Лаўрэатам прэміі другой ступені стала Соня Ван дэн Эндэ з Нідэрландаў, якая займаецца журналістыкай і праваабарончай дзейнасцю, трэцяй – турэцкі журналіст і праваабаронца Акай Дэпрэм.
Прызавы фонд прэміі складае 18 тысяч долараў. Лаўрэату першай ступені належыць узнагарода ў 10 тысяч, другой – 5 тысяч, трэцяй – 3 тысячы.
Як адзначылі ў Фондзе імя Чэчкі, асноўныя крытэрыі, па якіх прысуджаюць гэтыя ўзнагароды, – гэта ўклад лаўрэата ва ўмацаванне праў чалавека ў свеце і іх абароны, грамадскае прызнанне заслуг у праваабарончай дзейнасці, сацыяльная значнасць.
Эміль Чэчка, у гонар якога быў названы фонд, зарэгістраваны ў Беларусі ў лістападзе 2022 года, – салдат, які ўцёк з Польшчы ў Беларусь. Ён перайшоў на беларускі бок у канцы 2021-га. У шматлікіх інтэрв’ю ён распавёў пра шакавальныя факты забойстваў мігрантаў польскімі пагранічнікамі. Ваеннаслужачы прызнаўся, што і сам страляў у бежанцаў.
У сакавіку 2022 года Чэчка быў знойдзены мёртвым у Мінску. Як заявіў Дзмітрый Белякоў, кіраўнік праваабарончай арганізацыі "Сістэмная праваабарона" (цяпер ён таксама кіраўнік Фонду Чэчкі), з якой супрацоўнічаў Эміль, вайсковец, які ўцёк з Польшчы, быў нязручным сведкам для польскіх улад.
"Працягнем справу Эміля і будзем займацца і далей пытаннем бежанцаў і тымі паказаннямі, якія Эміль казаў аб расстрэлах на польскай тэрыторыі, да якіх прыцягваліся польскія вайскоўцы, якім пад пагрозай смерці ўсё гэта адбывалася", - адзначыў раней Белякоў.
