Паводле інфармацыі вытворцы, трамвай значна адрозніваецца ад папярэдніх мадэляў. Аднасекцыйная версія абсталявана чатырма дзвярыма, што паскарае пасадку і высадку пасажыраў. Асаблівая ўвага нададзена бяспецы: унікальная форма пярэдняй і задняй частак трамвая зніжае рызыку няшчасных выпадкаў, адкідаючы пешахода ў бок, а не пад колы. Дадатковае люстэрка выключае сляпыя зоны для кіроўцы.

Салон трамвая цалкам нізкападлогавы, што робіць яго даступным для маламабільных пасажыраў, уключаючы тых, хто карыстаецца інваліднымі каляскамі. Таксама ў трамваі рэалізаваны рашэнні, якія зніжаюць узровень шуму, напрыклад, устаноўка гумовых уставак паміж вобадам і калодкай кола.

Для камфорту пасажыраў у салоне прадугледжаны сучасныя опцыі: USB-раздымы для зарадкі гаджэтаў, Wi-Fi, GPS-навігацыя, а таксама падсвятленне пры адкрыцці і закрыцці дзвярэй.

Новыя трамваі абяцаюць зрабіць паездкі па горадзе не толькі зручнымі, але і бяспечнымі.

Звязда, 29 снежня 2024