28 мая ў Бішкеку пройдзе нефармальная сустрэча кіраўнікоў дзяржаў — членаў АДКБ Цэнтральна-Азіяцкага рэгіёну: Казахстана — Нурсултана Назарбаева, Кыргызстана — Алмазбека Атамбаева, Расіі — Уладзіміра Пуціна, Таджыкістана — Эмамалі Рахмона.

У АДКБ таксама ўваходзяць Арменія і Беларусь.

Нагадаем, у сярэдзіне красавіка прэс-служба АДКБ прадстаўляла нефармальны саміт у Бішкеку ў іншым фармаце — як "нефармальную сустрэчу кіраўнікоў дзяржаў — удзельніц Арганізацыі Дагавора аб калектыўнай бяспецы", гэта значыць як сустрэчу прэзідэнтаў усіх краін — членаў арганізацыі. Пытанні падрыхтоўкі да гэтага саміта абмяркоўваліся 15—16 красавіка падчас паездкі ў Кыргызстан дэлегацыі АДКБ на чале з генеральным сакратаром Мікалаем Бардзюжам.

Варта зазначыць, што напярэдадні саміту ў СМІ загучалі каментарыі, сутнасць якіх зводзіцца да таго, што на прыезд Аляксандра Лукашэнкі ў Кыргызстане могуць неадназначна адрэагаваць, паколькі Беларусь адмаўляецца выдаваць экс-прэзідэнта Курманбека Бакіева і яго брата Жаныша.

Паводле інфармацыі прэс-службы АДКБ ад 24 мая, падчас нефармальнай сустрэчы 28 мая, як чакаецца, асноўную ўвагу прэзідэнты нададуць пытанням удасканалення сістэмы калектыўнай бяспекі і рэалізацыі мер па супрацьдзеянні выклікам і пагрозам, што зыходзяць з тэрыторыі Афганістана, з улікам наступнага вываду адтуль у 2014 годзе міжнародных сіл садзейнічання бяспецы.

Напярэдадні сустрэчы прэзідэнтаў у Бішкеку адбудуцца пасяджэнні Савета міністраў замежных спраў, Савета міністраў абароны і Камітэта сакратароў саветаў бяспекі дзяржаў — членаў АДКБ, а таксама сумеснае пасяджэнне СМЗС, СМА і КССБ, паведаміла прэс-служба.

Будуць абмяркоўвацца пытанні ўдасканалення знешнепалітычнай каардынацыі ў межах АДКБ, рэалізацыі асноўных кірункаў развіцця ваеннага супрацоўніцтва дзяржаў АДКБ на перыяд да 2020 года і адпаведны план мерапрыемстваў, пералік сумяшчальных узораў узбраенняў і ваеннай тэхнікі і іх характарыстыкі.

Падчас пасяджэння КССБ сакратары саветаў бяспекі абмяркуюць арганізацыю ўзаемадзеяння дзяржаў ОбмБ у барацьбе з тэрарызмам, экстрэмізмам і трансмежавай злачыннасцю, а таксама памежную бяспеку з улікам развіцця сітуацыі ў Афганістане. На пасяджэнне КССБ для падпісання ўносіцца праект палажэння аб Каардынацыйнай нарадзе галоўных нарколагаў дзяржаў — членаў АДКБ.

У парадак дня сумеснага пасяджэння СМЗС, СМА і КССБ уключаны пытанні аб стане і структуры сістэмы калектыўнай бяспекі ў святле рэальна існуючых выклікаў і пагроз бяспецы дзяржаў — членаў АДКБ, праект плана кансультацый па пытаннях знешняй палітыкі і праекты дакументаў па падрыхтоўцы і правядзенні аперацый па падтрыманні міру Калектыўнымі міратворчымі сіламі АДКБ.

Вячаслаў Будкевіч, БелаПАН
Мінск, 24 мая 2013