"Мне Еўрасаюз асабіста дзевяць мільярдаў долараў ніколі не абяцаў", — заявіў Аляксандр Лукашэнка 7 кастрычніка ў Мінску на прэс-канферэнцыі для прадстаўнікоў расійскіх СМІ.
30 верасня на прэс-канферэнцыі па выніках саміта Усходняга партнёрства ў Варшаве прэм`ер-міністр старшынствуючай у ЕС Польшчы Дональд Туск заявіў, што Еўрасаюз гатовы выдзеліць Беларусі да 9 млрд. долараў на правядзенне рэформ у выпадку выканання пэўных умоў: вызваленне і рэабілітацыя палітзняволеных, дыялог з апазіцыяй і правядзенне свабодных выбараў.
"Калі б яны мне паабяцалі, я б падумаў, што яны звар`яцелі. Хто ж табе возьме і дасць 9 млрд.? Нават калі гэта крэдыт, то мы яшчэ падумаем. Калі пад 6—7% — гэта непрымальна, а 5 і ніжэй наўрад ці хто дасць. А як кітайцы пад 2—2,5%, то гэта рэдкасць", — сказаў Лукашэнка.
Паводле яго слоў, гэта "проста была вутка, разлічаная, што вось вы тут, беларусы, Лукашэнку кланяецеся, трымаеце, а калі б яго выкінулі, то 9 млрд. адразу далі б".
"Ніхто нікому проста так не дасць. Дзеля нас жа амерыканцы гэтыя 9 млрд. долараў не надрукуюць. А калі і дадуць камусьці, то пад штосьці, і потым возьмуць не 9 млрд, а 12, а то і больш. Паверце мне: я ўжо сутыкаўся з такімі шарлатанамі, якія абяцалі, а калі да справы дойдзе, ніякіх мільярдаў", — заявіў ён.
Сяргей Каралевіч,
БелаПАНМінск, 7 кастрычніка 2011
