Міністэрства замежных спраў Расіі рэзка адрэагавала на выказванні Аляксандра Лукашэнкі на адрас расійскіх СМІ.
"У чарговы раз з Мінска раздаліся папрокі на адрас шэрагу расійскіх сродкаў масавай інфармацыі, якія нібыта няправільна трактуюць сітуацыю ў Беларусі, — заявіў афіцыйны прадстаўнік МЗС Аляксандр Лукашэвіч. — Такія выказванні беларускіх прадстаўнікоў выклікаюць глыбокае шкадаванне".
"Замест сур`ёзнага аналізу цяжкасцяў, якія сапраўды сёння перажывае беларускае грамадства, міжнароднага становішча, што склалася вакол Беларусі, і пошуку мер па іх пераадоленні ў Мінску вырашылі пайсці па шляху найменшага супраціўлення. Вядома, прасцей знайсці вінаватых за межамі Беларусі і проста забараніць у гэтай краіне дзейнасць шэрагу СМІ. Але толькі наўрад ці гэта дапаможа стваральнай працы, паляпшэнню атмасферы расійска-беларускіх адносінаў, рэалізацыі нашых важных дамоўленасцяў. Гэта можа толькі нашкодзіць", — падкрэсліў прадстаўнік МЗС РФ.
27 мая на нарадзе аб цяперашняй сітуацыі на спажывецкім і валютным рынку Лукашэнка запатрабаваў закрыць шэраг сродкаў масавай інфармацыі.
"Больш за ўсё істэрыі ў расійскіх сродках масавай інфармацыі, — заявіў ён. — Я назіраю і за нашымі, перш за ўсё замежнымі, якія тут дзякуючы Адміністрацыі прэзідэнта сталі пануючымі сродкамі масавай інфармацыі, і за замежнымі. На другім месцы — нашы, якія выдаюцца тут. Я іх не называю, каб не ствараць ім рэйтынг, але зрабіце ўсё, каб гэтыя СМІ больш не прысутнічалі на нашай тэрыторыі".
"І не таму, што мы хочам закрыць рот. Не. Падкрэсліваю: я за імі ўважліва назіраў, увесь ажыятаж пачаўся адтуль", — сказаў беларускі кіраўнік.
Ён працытаваў некаторыя апошнія публікацыі ў СМІ. "Возьмем самыя шалёныя — расійскія сродкі масавай інфармацыі. У прыватнасці, мяне папракаюць тым, што я тэрмінова пакінуў краіну і збег (маецца на ўвазе камандзіроўка ў Казахстан). Яны нават забыліся, што такія камандзіроўкі плануюцца за год, дый куды ні бяжы, усё роўна давядзецца вяртацца ў краіну. Абвінавачваюць і Мясніковіча, і Пракаповіча, што сядзяць як мышы пад венікам", — заявіў Лукашэнка.
"Падлічваюць, колькі мы страцілі ў эканоміцы ў выніку дэвальвацыі. Папракаюць, што мы будзем шантажаваць Расію. Не ведаю, якія ў нас рычагі, каб шантажаваць велізарную краіну", — дадаў ён.
Дзмітрый Уласаў,
БелаПАНМінск, 27 мая 2011
