Пасол Беларусі ў Літве і Фінляндыі па сумяшчальніцтве Уладзімір Дражын правёў кансультацыі ў МЗС Фінляндыі з новым прызначаным генеральным дырэктарам дэпартамента Расіі, Усходняй Еўропы і Цэнтральнай Азіі Церхі Хакала.
Як паведамляе прэс-служба МЗС Беларусі, бакі абмеркавалі дынаміку беларуска-фінляндскіх адносін, перспектывы паглыблення і пашырэння эканамічных сувязяў, пытанні ўзаемадзеяння на гуманітарным кірунку, акрэслілі неабходнасць далейшага пашырэння рэгіянальнага супрацоўніцтва.
Падчас знаходжання ў Фінляндыі Дражын сустрэўся з дырэктарам Фінляндска-беларускай гандлёвай палаты Юуса Вііцікам. Сустрэча была прысвечана абмеркаванню пытанняў эканамічнага супрацоўніцтва, уключаючы ўдзел фінскага бізнесу ў VII Беларускім інвестыцыйным форуме, што мае адбыцца.
Прайшла таксама рабочая нарада з праектнымі каардынатарамі Фонду Джона Нурмінена па пытаннях рэалізацыі ў Беларусі міжнародных праектаў, скіраваных на зніжэнне нагрузкі эўтрыфікавальных біягенных элементаў шляхам ажыццяўлення інвестыцый у палепшаную ачыстку сцёкавых вод ад біягенаў на ачышчальных збудаваннях гарадоў Баранавічы, Брэст, Гродна, Віцебск і Маладзечна.
Дражын наведаў горад Лахці і сустрэўся з яго мэрам Юркі Мюлювіртам. Былі абмеркаваны пытанні актывізацыі супрацоўніцтва рэгіёнаў Фінляндыі і Беларусі, прасоўвання беларускіх тавараў на рынак Фінляндыі.
Таццяна Каравянкова,
БелаПАНМінск, 15 кастрычніка 2012
