Беларусь хацела б супрацоўнічаць з ЗША, заявіў Аляксандр Лукашэнка ў інтэрв`ю газеце The Washington Post, якое апублікавана 4 сакавіка. Інтэрв`ю амерыканскаму выданню беларускі кіраўнік даў 28 лютага.
Лукашэнка папрасіў інтэрв`юёра, старшага рэдактара газеты Элізабет Грэхем Веймаўт, перадаць амерыканцам, што беларусы ставяцца да іх вельмі добра. "Мы ніколі сабе не дазволім выстройваць жалезную заслону, каб яны не маглі да нас прыехаць", — сказаў ён.
Паводле слоў Лукашэнкі, беларусы спадзяваліся на зацікаўленасць амерыканцаў і еўрапейцаў у тым, каб Беларусь "была суверэннай і незалежнай", у выстройванні з ёй "прыстойных адносінаў". Аднак "падзеі 19 снежня нас пераканалі ў тым, што вы гэтага не хацелі і да 19 снежня", заявіў беларускі кіраўнік.
Ён выказаў меркаванне, што апазіцыянеры, удзельнікі судовых працэсаў, — гэта людзі, якіх накіроўвала амерыканская прапаганда і якія бралі амерыканскія грошы.
"Вы ўскладваеце віну за людзей у турме на ЗША?" — пацікавілася ў яго Веймаўт. "Каго ж яшчэ вініць? Мне трэба вініць Кітай? — сказаў у адказ Лукашэнка. — Мы не дазволім вам стварыць пятую калону ў Беларусі і падарваць беларускую сістэму".
Паводле яго слоў, "не дай Бог" амерыканцам перавярнуць сітуацыю ў Беларусі і зрабіць так, каб падзеі ў ёй развіваліся як у Лівіі ці Егіпце.
Антон Тарас,
БелаПАНМінск, 5 сакавіка 2011
