Скранулася з месца пытанне спрошчанага візавага рэжыму ЕС для грамадзян Беларусі, заявіла прэзідэнт Літвы Даля Грыбаўскайтэ 18 лютага пасля сустрэчы са старшынёй Еўрапейскага савета Херманам ван Рампёем.
"Абмяркоўвалася наша прапанова ў сувязі з аблягчэннем візавага рэжыму ў Еўропу для грамадзян Беларусі. Такі ліст я напісала прэзідэнту [ван Рампёю], і гэты працэс скрануўся, ён быў пазітыўна ацэнены ў ЕС і прэзідэнтам", — прыводзіць словы Грыбаўскайтэ на прэс-канферэнцыі інтэрнэт-рэсурс Delfi.
Старшыня Еўрапейскага савета, у сваю чаргу, таксама заявіў пра неабходнасць падтрымліваць грамадзянскую супольнасць Беларусі.
"Мы не павінны не звяртаць увагі на падзеі ва Усходняй Еўропе. Мы павінны падтрымаць грамадзянскую супольнасць у Беларусі. Удзел Літвы ў нашай палітыцы ў гэтай галіне вітаецца", — сказаў Рампёй.
Еўрапейскі савет з`яўляецца найвышэйшай палітычнай інстанцыяй Еўрасаюза.
Міністры краін ЕС у канцы студзеня вырашылі зрабіць Еўропу больш адкрытай для грамадзян Беларусі. Паралельна былі прынятыя рашэнні аб санкцыях супраць недэмакратычнага рэжыму краіны.
У сярэдзіне студзеня прэзідэнт Даля Грыбаўскайтэ даслала лісты кіраўнікам краін ЕС, у якіх заклікала шукаць магчымасць як мага найхутчэйшага спрашчэння візавага рэжыму для грамадзян Беларусі.
Шэраг дзяржаў Еўрасаюза, у прыватнасці Польшча, Латвія, Эстонія, Германія, ужо аб`явілі пра адмену платы за нацыянальныя візы для грамадзян у Беларусі.
БелаПАНМінск, 18 лютага 2011
