Кіраўнік беларускага знешнепалітычнага ведамства прыняў удзел у сумесным пасяджэнні Савета міністраў замежных спраў, Савета міністраў абароны і Камітэта сакратароў саветаў бяспекі АДКБ у Душанбэ. Па выніках пасяджэння быў ухвалены шэраг дакументаў па актуальных пытаннях функцыянавання і развіцця АДКБ.
Уладзімір Макей "акцэнтаваў пагаршэнне сістэмнага крызісу міжнародных адносін, паглыбленне палітычнай нестабільнасці і нарастанне супярэчнасцяў і ваенна-палітычнай канфрантацыі паміж асноўнымі цэнтрамі сілы", адзначае прэс-служба беларускага МЗС.
Па выніках пасяджэння міністр заявіў, што сёння некаторыя краіны "топчуць нагамі міжнароднае права", а таксама плююць на міжнароднае права, "вынаходзяць нейкія новыя формулы, якія яны называюць "правіламі".
"Ужо не міжнароднае права павінна панаваць ў забеспячэнні спакойнага развіцця планеты, а нейкія "правілы", якія вынаходзяцца па ініцыятыве некаторых нашых заходніх партнёраў. Мы катэгарычна супраць гэтага", - прыводзіць словы Макея БелТА.
Ствараюць штучныя праблемы
Кіраўнік МЗС Беларусі падчас пасяджэння распавёў аб адносінах рэспублікі з краінамі Захаду, а таксама аб "праблемах, якія нам штучна ствараюць заходнія партнёры".
Уладзімір Макей падкрэсліў, што падыходы беларускіх уладаў у цэлым "знаходзяць абсалютную падтрымку ва ўсіх саюзнікаў па АДКБ".
Міністр таксама дадаў, што сёння для "нагнятання запалу" ў канкрэтных краінах, а таксама "распальвання нянавісці ў цэлых рэгіёнах" актыўна выкарыстоўваюцца сацыяльныя сеткі.
Пагрозы тэрарызму актуальныя для Беларусі
Падчас пасяджэння прадстаўнікоў дзяржаў - членаў АДКБ удзельнікі абмеркавалі сітуацыю ў Афганістане. Уладзімір Макей распавёў, пры якіх умовах Беларусь будзе зацікаўленая ў тым, каб мець "нармальныя адносіны з гэтай краінай".
Паводле яго слоў, гэта адбудзецца, калі Мінск будзе бачыць, "што з тэрыторыі Афганістана не зыходзяць пагрозы для суседніх краін, што Афганістан прапаведуе спакойнае, міралюбнае развіццё сваёй краіны, накіраванае на выбудоўванне разнапланавага супрацоўніцтва з іншымі дзяржавамі".
Кіраўнік МЗС адзначыў таксама, што Беларусь павінна дачакацца канчатковага фармавання ўрада Афганістана.
"Мы лічым, што ўнутры краіны павінен быць арганізаваны інклюзіўны дыялог з уцягваннем розных катэгорый насельніцтва. Мы зацікаўлены ў тым, каб з тэрыторыі Афганістана не зыходзіла пагроза для суседзяў, а сёння гэтыя пагрозы маюць мнагамерны характар", - прыводзіць яго словы БелТА.
Пры гэтым міністр падкрэсліў, што пагрозы тэрарызму і экстрэмізму актуальныя не толькі для суседніх з Афганістанам дзяржаў, але і для іншых краін, у ліку якіх і Беларусі.
