Сустрэча прэзыдэнтаў ЗША і Расеі - Барака Абамы і Ўладзімера Пуціна - перанесена на 18-19 чэрвеня. Яна адбудзецца ў кулюарах саміту "групы дваццаці", які пройдзе ў Мэксыцы.

Пра гэта стала вядома па выніках тэлефоннай размовы Абамы і Пуціна. Расейскі прэзыдэнт паведаміў, што ня зможа прыехаць у ЗША на заплянаваны на 18-19 траўня саміт "вялікай васьмёркі". Замест Пуціна туды паедзе прэм`ер-міністар Расіі Дзьмітры Мядзьведзеў.

Як паведаміў Пуцін, яму неабходна завяршыць справы, зьвязаныя з фармаваньнем новага кабінэту міністраў.

Раней паведамлялася, што Абама патэлефанаваў Пуціну і павіншаваў яго з уступленьнем на пасаду прэзыдэнта Расеі.

У дзень інаўгурацыі Пуціна Вашынгтон раскрытыкаваў дзеяньні расейскай паліцыі ў дачыненьні да ўдзельнікаў апазыцыйных выступаў у Маскве. Дзярждэпартамэнт тады заявіў, што ў ЗША расчараваныя такім стаўленьнем да мірных дэманстрантаў. У сваю чаргу, Пуцін рабіў закіды на адрас ЗША ў сваёй перадвыбарнай кампаніі.

Радыё Свабода, 10 траўня 2012