У Джакарце 11 чэрвеня адбылася афіцыйная цырымонія адкрыцця пасольства Беларусі ў Інданезіі, у якой узяў удзел міністр замежных спраў Беларусі Сяргей Мартынаў.
Нагадаем, 11—13 чэрвеня кіраўнік беларускага знешнепалітычнага ведамства знаходзіцца з афіцыйным візітам у Інданезіі.
Як паведамляе прэс-служба МЗС Беларусі, Сяргей Мартынаў і яго інданезійскі калега Марці Наталегава правялі сёння перамовы.
Міністры абмеркавалі "пытанні развіцця супрацоўніцтва па ўсім двухбаковым парадку дня і магчымасці нарошчвання ўзаемадзеяння паміж Беларуссю і Інданезіяй у шматбаковым фармаце". Па выніках сустрэчы падпісаны мемарандум аб паразуменні паміж міністэрствамі замежных спраў Рэспублікі Беларусь і Рэспублікі Інданезія аб двухбаковых кансультацыях.
Кіраўнікі знешнепалітычных ведамстваў таксама абмяняліся нотамі аб ратыфікацыі падпісанага ў 2011 годзе пагаднення паміж урадамі дзвюх краін аб бязвізавых паездках для ўладальнікаў дыпламатычных і службовых пашпартоў. Пагадненне набудзе моц 9 ліпеня 2012 года.
Андрэй Серада,
БелаПАНМінск, 11 чэрвеня 2012
