Як паведамляе прэс-служба прэзідэнта, падчас візіту пройдуць перамовы кіраўніка беларускай дзяржавы з прэзідэнтам Таджыкістана Эмамалі Рахмонам у вузкім і пашыраным складзе, на якіх "плануецца абмеркаваць шырокі спектр пытанняў па далейшым развіцці ўземавыгаднага беларуска-таджыкскага супрацоўніцтва".
Па выніках перамоў запланавана падпісанне шэрагу двухбаковых дакументаў, у тым ліку ў такіх сферах, як гандлёва-эканамічнае супрацоўніцтва, культура і мастацтва, маладзёжная палітыка, папярэджанне надзвычайных сітуацый.
Плануецца таксама, што Лукашэнка наведае парламент Таджыкістана, аб`екты прамысловасці і сацыяльна-культурнай сферы.
Кіраўніка дзяржавы "суправаджае прадстаўнічая беларуская дэлегацыя, члены якой правядуць перамовы з таджыкскімі калегамі аб перспектывах развіцця міжгаліновага ўзаемадзеяння", паведамляе прэс-служба.
Папярэдні афіцыйны візіт Лукашэнкі ў Таджыкістан адбыўся ў красавіку 2000 года. У ліпені 2001-га Эмамалі Рахмон наведаў Беларусь з візітам у адказ. Кіраўнікі дзяржаў таксама рэгулярна сустракаюцца падчас розных міжнародных форумаў, зазначае прэс-служба.
Па выніках 2010 года тавараабарот Беларусі з Таджыкістанам склаў 47,6 млн. долараў, павялічыўшыся на 4,2% у параўнанні з мінулым годам. За студзень—жнівень гэтага года тавараабарот узрос больш чым на 84%. Аснову экспарту Беларусі ў Таджыкістан складаюць цукар, трактары, фтарыды, прадукцыя дрэваапрацоўкі, мэбля, лекавыя сродкі, гаворыцца ў афіцыйным прэс-рэлізе.
Марына Носава,
БелаПАНМінск, 27 кастрычніка 2011
